Jetisý jerinde kezekte turǵan áleýettik osal top ókilderine 40 úıdiń kilti tabystaldy. Aldymen Kúreńbel jerindegi tórt eldi mekende salynǵan baspanalar aýyl halqyn qýantsa, odan keıin oblys ortalyǵynda 17 páter ıesin tapty. Bıyl óńirde júzdegen otbasy qonystoıyn jasady. Keler jyly taǵy da kópqabatty birneshe úıdiń qurylysy aıaqtalady.
Jetisý jerinde shalǵaıdaǵy aýyl-aımaqtarda da turǵyn úı salý jumysy qyzý júrip jatyr. Solardyń ishinde Kerbulaq aýdanyna qarasty Altynemel aýylynda 5 úı, Shanhanaı, Shubar, Qaspan aýyldarynyń árqaısysynda 6 úıden paıdalanýǵa berildi. Aýdan ákimi Qanat Esbolatov aýyldarǵa arnaıy baryp, jeke turǵyn úı kiltterin jańa ıelerine tabystady.
Aýdan ákimdiginiń málimetine qaraǵanda, turǵyn úı kezeginde 1 603 adam tur. Olardy baspanamen qamtamasyz etý maqsatynda qazirgi ýaqytta baǵdarly jumystar júıeli atqarylyp keledi.
«Búginde Kerbulaq aýdanyna qarasty aýyldarda 100 jeke turǵyn úı salynyp jatyr. Odan bólek aýdan ortalyǵy Saryózek aýylynda 60 páterli eki kópqabatty úıdiń qurylysy aıaqtalýǵa jaqyn. Taǵy 60 páterlik bir úıdi Respýblıka kúni qarsańynda qoldanysqa berdik. Salynyp jatqan turǵyn úılerdiń barlyǵy kezekte turǵan azamattarǵa, sonyń ishinde turmysy tómen, áleýmettik osal toptaǵy turǵyndarǵa, úıleri apatty dep tanylǵandarǵa beriledi», deıdi Kerbulaq aýdandyq qurylys jáne qala qurylysy bóliminiń basshysy Baqytkeldi Qabıdolda.
Aýyldardaǵy jańa úıler 3 bólmeden turady. Árqaısysynyń aýmaǵy 77 sharshy metr. Úı ishinde turmysqa qajetti qolaıly jaǵdaı tolyq qarastyrylǵan. Jańa qonys qýanyshyna kenelgen azamattardyń ishinde Qaspan aýlynyń turǵyny Gúlmıra Janataeva da bar.
«Qaspan aýlynda kórnekti, jańa alty úı salyndy. Sonyń biri – birinshi toptaǵy múgedektigi bar balama berildi. Úıdiń ishi, jaıly, keń, kóńilimizden shyqty. Osyndaı qýanysh baspanaǵa zárý azamattarǵa juǵysty bolsyn, uzaǵynan súıindirsin», deıdi qaspandyq turǵyn.
Taldyqorǵan qalasyndaǵy «Shyǵys» shaǵyn aýdanynda da 17 otbasyna jańa baspana berildi. Jańa páterge ıe bolǵandar qatarynda jetim balalar, múgedektigi bar balany tárbıeleýshi otbasylar, kópbalaly analar, tolyq emes otbasylar, Ekinshi dúnıejúzilik soǵystyń ardagerlerine teńestirilgen azamattar bar. Baspanaly bolyp jatqan turǵyndardy qýanyshtarymen quttyqtaýǵa qala ákiminiń orynbasary Jeńis Andabekov arnaıy kelip, páter kiltterin tabys etti.
«Kópten kútken páterimdi alyp, rıza bolyp jatyrmyz. Múgedektigi bar balany tárbıeleýshi otbasy retinde kezekte turyp, 10 jyldan asa ýaqyt kúttik. Mine, sol kúnge de jettik. Halyqtyń jaǵdaıyna asa kóńil bólip jatqan qala basshylyǵyna analyq alǵysymdy aıtamyn», dedi Almıra Zakarıanova.
Oblys ákimi baspasóz qyzmetiniń málimetinshe, ótken on aıda óńirde 247,6 myń sharshy metr turǵyn úı paıdalanýǵa berilgen. Taldyqorǵandaǵy páter kilti 5 jetim balaǵa, 4 múgedektigi bar balany tárbıeleýshi otbasyna, 3 kópbalaly anaǵa, 2 tolyq emes otbasylarǵa, Ekinshi dúnıejúzilik soǵys ardagerlerine teńestirilgen 2 azamatqa, sondaı-aq áskerı qyzmetin oryndaý kezinde qaıtys bolǵan bir otbasyna tabystaldy.
Jetisý oblysy