Dara tulǵalar taǵylymy

Mádenıet jáne aqparat mınıs­tr­­­liginiń «Ulytaý» ulttyq tarı­hı-mádenı jáne tabıǵı mýzeı-qo­ryǵynyń uıymdastyrýymen ótken Q.Sátbaev pen Á.Marǵulannyń qun­dy muralaryna, olardyń Ulytaý óńirinde jasaǵan eren eńbekterine, kásibı qyzmetine baǵa berý, sondaı-aq qos ǵalym týraly sırek kezdesetin derektermen bólisýdi murat tutqan, maqsat etken is-sharaǵa Almaty, Astana, Pavlodar, Qaraǵandy, t.b. qalalarynda turatyn tarıhshylar, ólketanýshylar jáne mýzeı qyzmetkerleri qatysyp (oflaın, onlaın), birneshe baıandama jasady. Olardyń arasynda tarıh ǵylymdarynyń kandıdaty, Á.Marǵulan atyndaǵy Arheologııa ınstıtýtynyń bas ǵylymı qyz­metkeri J.Qurmanqulov, Á.Mar­ǵulan atyndaǵy mektep-lıseıdegi memorıaldyq mýzeıdiń jetekshisi S.Baıdyrahmanova, Baıanaýyldaǵy Q.Sátbaev mýzeıiniń dırektory Q.Abyl­ǵazın, t.b. boldy. Dóńge­lek ústelge Dánel Álkeıqyzy onlaın qatysyp, óz oılaryn ortaǵa aldy.

Is-sharaǵa qatysýshylar tara­pynan atalǵan tulǵalardyń memo­rıaldyq mýzeıleri elimizde onsha kóp emes ekendigine nazar aýdaryldy. Aıtalyq, Qanysh Sátbaevtyń memorıaldyq mýzeıleri Almaty qalasynda, Pavlodar jáne Uly­taý oblystarynda ǵana jumys isteıtin bolsa, Álkeı Haqanuly Marǵulannyń memorıaldyq mýzeıi tek Astana qalasyndaǵy № 40 mektep-lıseıinde ǵana bar eken. Bul, árıne oılandyratyn jaǵdaı. Jezdi kentindegi M.Tóregeldın atyndaǵy taý-ken jáne balqytý isi murajaıynyń meńgerýshisi Z.Qazanbaeva ǵalymdardyń zerttegen salalary boıynsha mýzeı uıymdastyrý isiniń múldem jolǵa qoıylmaǵanyna qynjylys bildirdi. «Mysaly, nege bizdiń elimizde kıiz úı mýzeıin uıymdastyrmasqa? Bir ǵa­na kıiz úı arqyly etnografııany da, ta­rıhty da, estetıka, t. b. qundy­lyqtar­dy da tanystyrýǵa bolar edi», dedi ol.

Qazaqstannyń eńbek sińirgen án­shi­si Ǵ.Muhamedın Qanysh Iman­taı­­uly Sátbaevtyń A.Zataevıchke jazdyr­­ǵan 23 ániniń tóńireginde de birqatar is-sharany júzege asyrýdy usyndy.

Dóńgelek ústel sońy Á.Mar­ǵu­lan­nyń tutynǵan, paıdalanǵan zattarynan uıymdastyrylǵan kórmege ulasty.

Jezqazǵan