Senat spıkeri Máýlen Áshimbaevtyń tóraǵalyǵymen palata bıýrosynda depýtattar Senat otyrysynyń kún tártibin bekitti.
Otyrys barysynda bıýro músheleri 6 jeltoqsan kúni «Azyq-túlik qaýipsizdigi – ulttyq qaýipsizdiktiń negizgi quramdas bóligi» taqyrybyna arnalǵan parlamenttik tyńdaý ótkizý týraly qaýly qabyldady.
M.Áshimbaev parlamenttik tyńdaýda talqylanatyn máseleniń ózektiligi men mańyzyna nazar aýdaryp, BUU-nyń Dúnıejúzilik azyq-túlik baǵdarlamasy 2025 jyly 343 mıllıonǵa jýyq adam ashtyqtan zardap shegedi dep boljap otyrǵanyn tilge tıek etti.
«Halyqty sapaly jáne qoljetimdi azyq-túlikpen qamtamasyz etý – kez kelgen memleket úshin strategııalyq másele. Qazaqstan azyq-túlik qaýipsizdigin qamtamasyz etý úshin aıtarlyqtaı áleýetke ıe. Degenmen bul baǵytta ózekti problemalar da bar. Tyńdaý barysynda sol túıtkilderge basa mán berip, mazmundy jáne nátıjeli talqylaý uıymdastyrý qajet», dedi Senat tóraǵasy.
Sonymen qatar bıýro músheleri bekitken kún tártibine sáıkes senatorlar palata otyrysynda eki máseleni qaraıdy: «2024 – 2026 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań; «Qazaqstan Respýblıkasynyń keıbir zańnamalyq aktilerine aqparatqa qol jetkizý, qoǵamdyq qatysý, memlekettik nagradalar jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zań. Bul qujattyń normalary aqparatqa qol jetkizý salasyndaǵy zańnamany jetildirýge arnalǵan. Osylaısha, zańda aqparatqa qol jetkizý quqyǵyn zańsyz shektegeni úshin memlekettik organdardyń jaýapkershiligin kúsheıtýge jáne aqparattyń ashyqtyǵy men ony aldyn ala taratý qaǵıdattaryn bekitýge baǵyttalǵan normalar qarastyrylǵan. Múgedektigi bar adamdardyń aqparatqa qol jetkizýine qajetti jaǵdaı jasaýǵa da erekshe nazar aýdarylyp otyr.
Buǵan qosa bıýroda buǵan deıin Májilis qabyldaǵan zańdar jumys úshin Senattyń turaqty komıtetterine bólinip berildi.