Májilis tóraǵasy Erlan Qoshanov Máskeý qalalyq dýmasynyń tóraǵasy Alekseı Shaposhnıkovpen jergilikti ókildi organdar arasyndaǵy yntymaqtastyqty nyǵaıtý máselesin talqylady.
Májilis spıkeri Máskeý qalalyq dýmasynyń delegasııasymen kezdesýde eki el arasynda barlyq deńgeıde ózara tyǵyz baılanys ornaǵanyn atap ótti.
– Sizdiń elordaǵa saparyńyz eki astananyń ókildi organdary arasyndaǵy yntymaqtastyqty jańa deńgeıge kóteredi. Bul óte mańyzdy, óıtkeni Astana men Máskeý depýtattary óz óńirleriniń máselelerin jaqsy biledi jáne eki elorda arasyndaǵy baılanystardyń mazmunyn tolyqtyra alady, – dedi E.Qoshanov.
Májilis tóraǵasy Reseı Prezıdenti Vladımır Pýtınniń Qazaqstanǵa jaqynda jasaǵan memlekettik saparynyń tarıhı mańyzyna nazar aýdaryp, Qazaqstan men Reseı basshylarynyń tatý kórshilik qarym-qatynastardy nyǵaıtýdaǵy erekshe róline jeke toqtaldy.
Sapar qorytyndysy boıynsha jańa jahandyq tártip jaǵdaıynda strategııalyq seriktestikti tereńdetý týraly birlesken málimdeme qabyldandy. Onda parlamentaralyq yntymaqtastyqtyń joǵary qarqyny atap ótilgen.
– Bul – eki el parlamentteriniń qarym-qatynasyna berilgen óte joǵary baǵa. Bizdiń parlamentshiler bir-birimen jeke de, jumys boıynsha da tikeleı baılanysta bolyp, týyndaǵan máselelerdi jedel sheshedi. Osy jazda Memlekettik Dýmamen yntymaqtastyq jónindegi parlamentaralyq komıssııanyń jumysy qaıta jandandy, – dedi Májilis spıkeri.
A.Shaposhnıkov qonaqjaılyq úshin alǵysyn bildirip, Astana máslıhaty men Máskeý qalalyq dýmasy arasyndaǵy ózara yqpaldastyqty odan ári damytýdy usyndy. Sondaı-aq taraptar mádenı, bilim berý jáne ekonomıka salalardaǵy yntymaqtastyq jónindegi birqatar máseleni talqylady.