Jedel-profılaktıkalyq is-sharalar barysynda polısııa qyzmetkerleri asa iri kólemde esirtkini zańsyz taratqan degen kúdikpen 30 jastaǵy er adamdy ustady, dep habarlaıdy Egemen.kz Polisia.kz-ke silteme jasap.
Kúdiktiniń eldiń ońtústik óńirlerinen tyıym salynǵan zattardy ákelip, tutynýshylardy izdep, olarmen áleýmettik jeli arqyly kelissózder júrgizgeni anyqtalǵan.
«Osy maqsatta er adam páter jaldap, odan ári satý úshin esirtkini oraýmen aınalysqan. Tintý kezinde shkafta sur-qara tústi zat salynǵan paket, arnaıy ıisi bar ósimdik tektes zaty bar folgaǵa oralǵan paketter, elektrondy tarazylar, 5 myń dana kólemindegi bos zip-lock qaptar, sondaı-aq 7,5 mln teńgege jýyq aqshalaı qarajat anyqtalyp tárkilendi», delingen habarlamada.
Sonymen qatar onyń turǵylyqty jerinen «OSA» travmatıkalyq tapanshasy men «RAK» travmatıkalyq oqtaryn atýǵa qabiletti gazdy tapansha jáne 9 rezeńke patron tárkilengen. Saraptama qorytyndysyna sáıkes, ustalǵan azamattan tárkilengen zattar salmaǵy 2 keliden asatyn qarasora shaıyry ekeni anyqtalǵan.
Atalǵan oqıǵa boıynsha qylmystyq is qozǵalǵan. Kúdikti Astana qalasy PD ýaqytsha ustaý ızolıatoryna qamalǵan.