Semeı qalasynda belgili balýan, halyqaralyq dárejedegi sport sheberi Qýanysh Jumabekuly Salyqbaevty eske alýǵa arnalǵan jasóspirimder arasyndaǵy respýblıkalyq týrnır ótti. Kúres óneriniń kórnekti tulǵasy atyndaǵy saıys bıyl ekinshi márte jalaýyn jelbiretti.
Kúrestiń úsh túrinen úlken dárejege jetip, abyroıy asqaqtaǵan Qýanysh Salyqbaev 1971 jylǵy 8 shildede burynǵy Semeı oblysy, Maqanshy aýdany, Qyzylbulaq aýylynda dúnıege kelgen. Sportqa degen qushtarlyǵy erte oıanǵan jas 1983 jyly «Qaırat» qoǵamynyń sportzalyna baryp, Tóleýbek Shákenov, Asqar Temirjanov syndy bapkerlerden sambo, qazaq kúresiniń ádis-tásilderine qanyǵa bastaıdy. 1987 jyly Semeı oblysynyń birinshiliginde sambodan 2-oryn, 1989 jyly oblystyq keńestiń birinshiliginde 1-oryndy ıelendi. Sóıtip, Semeı óńirine tanymal bapkerler, elimizdiń eńbek sińirgen jattyqtyrýshylary Serik Toqtarǵazın, Serik Qorjykenovterdiń nazaryna iligip, sport jolynda kóptegen bıikti baǵyndyrdy.
Q.Salyqbaev – sambodan elimizdiń bes dúrkin chempıony, tórt dúrkin el kýboginiń ıegeri, Azııa chempıonatynyń kúmis (2000), altyn (2001) júldegeri, Álem chempıony (2006). Qazaq kúresinen elimizdiń úsh dúrkin chempıony, otyzǵa tarta respýblıkalyq, halyqaralyq týrnırlerdiń jeńimpazy, el kýboginiń tórt márte ıegeri, Azııa chempıony (2007). Dzıýdodan birneshe márte respýblıkalyq, halyqaralyq týrnırlerdiń júldegeri, el birinshiliginiń kúmis júldegeri. Ol qajyrly eńbeginiń nátıjesinde kúrestiń úsh túrin erkin meńgerip, sambo men qazaq kúresinen halyqaralyq dárejedegi sport sheberi atanyp, óńir sportynyń óristeýine ǵana emes, qazaq kúresiniń damýyna esepsiz eńbek sińirdi.
Adam balasynyń qaı salada bolsyn artynan shákirt ertýi – paryz. Bul turǵyda Qýanysh Jumabekuly bapkerlik joldy bastaǵan 2016 jyldan sońǵy demi úzilgen 2019 jylǵa deıingi aralyqta aımaq-atyraptaǵy boıynda oty bar jastardyń jarqyrap kórinýine, sportqa beıimdi balalar men jasóspirimderdi sportqa, salamatty ómir saltyna baýlýǵa kóp úles qosty. Bapkerdiń tálim-tárbıesin kórgen sportshylar ishinen Nurjan Melsov, Erasyl Nurahmetov syndy shákirtterin erekshe ataýǵa bolady.
Jarysqa elimizdiń barlyq derlik óńirinen 2007–2008 jyldary týǵan jasóspirimder qatysty. Jalpy jıyny 18 komanda, 164 sportshy baq synap, synǵa tústi. Týrnır Abaı oblystyq mamandandyrylǵan balalar-jasóspirimder olımpıadalyq rezervtik sport mektebiniń bastamasyna oraı, oblystyq dene shynyqtyrý jáne sport basqarmasynyń uıymdastyrýymen ótti. Ashylý saltanatynda sóz alǵan dańqty balýannyń asyl jary Gaýhar Salyqbaeva er esimin el esinde saqtap, joǵary dárejede jarys uıymdastyrǵan barsha azamatqa alǵys bildirdi.
«Qýanyshtyń sporttaǵy jolyn talmaı nasıhattap, ulyqtap kele jatqan bapkerlerine, dostary men shákirtterine, izin basqan baýyrlaryna, qaı kezde de bizge qoldaý bildirip otyratyn jandarǵa rızashylyǵymyz zor. Osy jarystyń ótýine demeýshilik kórsetken Serik Toqtarǵazın, Serik Qorjykenov, Qaırat Charmuhamedov, Shalqar Jolamanov, Aıbek Nuǵymarov, Dýman Qyzdarbekov, Qaırat Kúnsafın, Ashat Ospanov, Aman Sháripov sııaqty azamattarǵa, dostary Qýat pen Bekjanǵa alǵystan basqa aıtarymyz joq. Týrnır keleshekte elimizdiń atyn álemge tanytatyn sportshylardyń ósip-shyǵýyna jol ashady dep senemiz», dedi Gaýhar Slámbekqyzy.
Eki kúnge sozylǵan týrnır qorytyndysyna sáıkes 70 kg salmaq dárejesinde 1-oryndy Dastan Qazyhanov, 2-oryndy Bekarys Saılaý, 3-oryndy Temirlan Maqsatov, Ernur Qabdrahman ıelense, 76 kg salmaqta 1-oryn Almas Rysbekovke, 2-oryn Dosjan Rahymbaevqa, 3-oryn Nurdos Qaıratov pen Islam Medetqalıǵa buıyrdy. 82 kg salmaq dárejesinde Sultan-Beıbarys Qaıratuly 1-oryn, Aıvar Beısenbek 2-oryn ıelense, Qýatbek Qajybek pen Arnur Amanov 3-oryndy ózara bólisti. 82 kg-nan joǵary salmaqta saıysqa túskender arasynda Nurbolat Jambyl 1-oryn, Saǵııat Serikqalı 2-oryn, Ahmet Qapen men Nurlanbek Talǵatuly 3-oryn aldy.
«Keıingi jyldary oblysta túrli bedeldi týrnırlerdi ótkizý dástúrge aınalyp keledi. Mundaı baıraqty básekeler jergilikti jastardyń ishinen shyn myqtyny anyqtaýǵa jaqsy múmkindik týǵyzady. Sol turǵyda aldaǵy ýaqytta Qýanysh Salyqbaev atyndaǵy týrnırdiń aıasyn keńeıtý oıymyzda bar», deıdi uıymdastyrýshylar.
Abaı oblysy