Týrızm jáne sport mınıstri Erbol Myrzabosynov Abaı oblysyna jumys sapary barysynda óńirdegi sport nysandaryn aralap, sport ınfraqurylymyn jaqsartý jáne damytý maqsatynda jasalyp jatqan jumystarmen tanysty, dep habarlaıdy Egemen.kz.
Erbol Myrzabosynov eń aldymen 2020 jyly paıdalanýǵa berilgen «Arena» mádenı-sport keshenine bardy. Bul keshende balalarǵa basketbol, fýtbol, tennıs, sý polo jáne júzý sııaqty sport túrlerimen erkin aınalysýǵa barlyq qajetti jaǵdaılar jasalǵan. Munda zamanaýı jabdyqtar, keń ári yńǵaıly alańdar bar, bul balalardyń sportpen shuǵyldanýyna úlken múmkindik beredi.
Sondaı-aq óńirdegi jattyqtyrýshylarmen kezdesip, olardyń pikirleri men usynystaryn tyńdap, jergilikti mamandardyń jumys sharttary men máselelerin nazarǵa aldy.
Mınıstr jattyqtyrýshylarmen kezdesýde olımpıadalyq rezervti daıarlaý máselesiniń mańyzdylyǵyn atap ótti. Bul másele Qazaqstanda joǵary deńgeıdegi sportshylardy daıyndaýǵa kedergi keltirýde. Mınıstr máseleni sheshý úshin bolashaqta arnaıy baǵdarlamalar men jobalardy iske asyrý qajettigin aıtty.
Budan bólek, ol jattyqtyrýshylardyń biliktiligin arttyrýdyń mańyzdylyǵyna toqtalyp, olardy úzdiksiz bilim berý baǵdarlamalarymen qamtamasyz etý qajettigin atap ótti. Sporttyq medısına salasyna da kóp kóńil bólinýi kerektigin, onyń sportshylardyń densaýlyǵyn saqtaý jáne tıimdi jattyǵý prosesin uıymdastyrý úshin mańyzdy ról atqaratynyn jetkizdi.
Budan ári mınıstr Jaqsylyq Úshkempirov atyndaǵy Semeı qalasyndaǵy №1 oblystyq olımpıadalyq rezerv mamandandyrylǵan balalar-jasóspirimder sport mektebine bardy. Munda balalar boks, dzıýdo, grek-rım kúresi, erkin kúres, velosport, taekvondo (WT, I.T.F), sporttyq jáne jaýyngerlik sambo, sondaı-aq voleıbol sekildi sport túrlerimen aınalysady.
«Qazirgi tańda Abaı oblysynda jazǵy jáne qysqy olımpıadalyq, olımpıadalyq emes, paralımpıadalyq, sýrdlımpıadalyq sport túrleri qarqyndy damyp keledi. Ulttyq sport túrlerine degen qyzyǵýshylyq ta arta túsýde. Qyrkúıek aıynda elordamyzda 5-shi Dúnıejúzilik kóshpendiler oıyndary ótkenin jaqsy bilesizder. Abaı oblysynyń sportshylary 3 altyn jáne 2 kúmis medaldi enshiledi. Kelesi jyldyń basty sporttyq oqıǵalarynyń biri – Qytaıdyń Harbın qalasynda ótetin qysqy Azııa oıyndary. Búginde sportshylarymyzdyń sátti óner kórsetýin qamtamasyz etý boıynsha daıyndyq jumystary júrgizilýde. Qazaqstan quramasynan 6 sport túrinen 139 sportshy qatysady dep josparlanýda. Sonyń ishinde Abaı oblysynan 4 sportshy, atap aıtqanda bıatlonnan – 2, shańǵy jarysynan 2 sportshy qatysady», dedi Erbol Myrzabosynov.