Áýlıekólde «Sadaǵań keteıin» atty dramanyń premerasy ótti. Jergilikti «Shabyt» teatry sahnalaǵan jańa qoıylym bir áýlettiń mysalynda búgingi qoǵamda kórinis berip qalatyn keleńsiz jaıttardy, aldyńǵy býyn men keıingi jastardyń dúnıetanymyndaǵy qaıshylyqtardy ashyp kórsetedi.
Sahnada lýdomanııa, nashaqorlyq jáne otbasylyq qatynastardyń buzylýy sııaqty máseleler kóterildi. Keıipkerlerdiń taǵdyry, olardyń jaza basyp, orny tolmas ókinishti jaǵdaıǵa urynyp, opyq jep qalýy kórermenge úlken oı salady. Otbasy berekesiniń qashýy, áke men uldyń, ana men qyzdyń, aǵaıyndy baýyrlardyń arasyndaǵy ózara syı-qurmettiń joǵalýy túrli oıǵa jetelep, kóńilge qaıaý túsiredi. Bir týǵan baýyrlar ata-analary kenetten dúnıe salǵannan keıin ǵana baryp es jıyp, ótken ómirlerin qaıta tarazylaı bastaıdy. Alaıda ýystan shyǵyp ketken múmkindikti, ótip ketken ýaqytty keri qaıtara almaısyń.
«Qoıylym júrek tebirentedi. Sahnada drama men tragedııa qatar órbıdi. Akterlerdiń sahnany erkin ıgerýi, ózi somdaǵan obrazdy óte nanymdy oınap shyqqany qaıran qaldyrdy. Bylaısha jaı kúnderi kúnde kórip júrgen qarapaıym adamdardyń boıynda osyndaı úlken qabilet jasyrynyp jatatynyn buryn bilmeppin. Sahnadaǵy qym-qýyt oqıǵalardyń bári kóz aldymda ótip jatqandaı áser qaldyrady. Qoıylym ómirdiń ótkinshi, ýaqyttyń júırik ekenin eske salady. Sondyqtan tirisinde ata-anańnyń qadirine jetip, jaqyn baýyrlaryńdy qurmetteı bilýge úıretedi», deıdi kórermenderdiń biri.
Qoıylymdy sahnalaǵan kásibı mamandar emes, qarapaıym aýyl azamattary. Olardyń ishinde muǵalimder, dárigerler, memlekettik qyzmetshiler, oqýshylar bar.
«Shabyt» teatrynyń jetekshisi Nurjamal Qultaevanyń aıtýynsha, teatr trýppasy endi aýdanǵa qarasty aýyldardy aralap, gastrolge shyǵýdy oılastyryp jatyr.
«Teatr qurý ıdeıasy 2015 jyly, óner mektebinde akterlik sheberlikten sabaq bere bastaǵan kezde týdy. Sodan 2023 jyly aýdan ákimdiginiń kómegimen teatr quryp, ony «Shabyt» dep atadyq. Osy qysqa ýaqyttyń ishinde jetken jetistigimiz ózimizdiń shyǵarmashylyq ujymnyń birlesken eńbeginiń jáne jergilikti ákimshiliktiń úlken qoldaýynyń nátıjesi dep bilemin», deıdi teatr jetekshisi.
«Sadaǵań keteıin» spektakline aýdan basshylary, oblys kórkemónerpazdarynyń halyq shyǵarmashylyǵy ortalyǵynyń ókilderi de keldi. Jalpy, halyqtyń kóńilinen shyqqan qoıylym, sheneýnikterge de qatty unasa kerek. Atalǵan qoıylym qańtar aıynda oblys ortalyǵynda sahnalanatyn boldy.
Qostanaı oblysy