2024 jyly Qazaqstannyń áskerı bilim berý salasyndaǵy mańyzdy jetistikteriniń biri Qazaqstannyń barlyq áskerı oqý oryndaryn biriktirgen áskerı kópfýnksıonaldy bilim berý platformasyn ázirleý jáne engizý boldy, dep jazady Egemen.kz.
Qazirdiń ózinde 150 áskerı qyzmetshi turaqty ornalasqan jerinen qol úzbeı biliktilikti arttyrýdyń 10 baǵyty boıynsha onlaın oqyp jatyr. 10 tyńdaýshy belgilengen úlgidegi sertıfıkat alǵan.
Platforma Qurlyq áskerleriniń áskerı ınstıtýtynda, Almaty qalasynyń Radıoelektronıka jáne baılanys áskerı-ınjenerlik ınstıtýtynda, Aqtóbedegi Áýe qorǵanysy kúshteriniń áskerı ınstıtýtynda jáne Astana qalasyndaǵy Ulttyq qorǵanys ýnıversıtetinde ornalastyrylǵan.
Bul ártúrli eńbek fýnksııalaryn oryndaıtyn jeke modýlderdi, ýnıversıtetaralyq kitaphanany, oqý prosesin josparlaý qujattaryn, elektrondyq jýrnaldardy jáne sıfrlyq bilim berý resýrstaryn qamtıdy.
2024 jyldyń 1 qyrkúıeginen bastap elektrondy jýrnaldar men sıfrlyq bilim berý resýrstaryn qoldana otyryp, bilim berý prosesi bastalyp, bul kýrsanttardyń úlgerimin baqylaýdy edáýir jaqsartty.
О́tken jyly 15000-ǵa jýyq zapastaǵy ofıser men serjant áskerı kafedralarǵa qabyldandy.
Qorǵanys mınıstri general-polkovnık Rýslan Jaqsylyqov Qarýly kúshter usynǵan ólshemderdi eskere otyryp, áskerı kafedralarda zapastaǵy ofıserler men serjanttardy áskerı daıarlaý baǵdarlamalaryn qaıta qaraýdy tapsyrdy. Olarǵa Qurlyq áskerleri áskerı ınstıtýtynyń túlekteri - kýrsanttarǵa arnalǵan «Sardar» kýrstaryna uqsas oqý jıyndaryn ótkizýdi qaraý jóninde nusqaýlar berilgen.
Joǵary jáne joǵary oqý ornynan keıingi bilim berý uıymdarynda 41 áskerı kafedra jumys isteıdi, onda zapastaǵy ofıserler men serjanttar baǵdarlamalary boıynsha 15 myńǵa jýyq stýdent daıarlanady. Onyń ishinde zapastaǵy ofıserlerdi daıarlaý baǵdarlamalary boıynsha – 6 744 adam, zapastaǵy serjanttar – 8 048 adam. Zapastaǵy ofıserlerdiń baǵdarlamalary boıynsha oqýdan ótken stýdentter Qazaqstan Respýblıkasy Úkimetiniń qaýlysymen eki jyl merzimge áskerı qyzmetke shaqyrylady.