L.N. Gýmılev atyndaǵy Eýrazııa ulttyq ýnıversıtetinde «Áleýmettik jumys» kadrlardy daıarlaý baǵyty boıynsha Oqý-ádistemelik birlestigi respýblıkalyq oqý-ádistemelik keńesiniń jobalardy basqarý tobynyń keńeıtilgen otyrysy ótti, dep habarlaıdy Egemen.kz.
Is-shara «Ádiletti Qazaqstan: quqyq tártibi, ekonomıkalyq ósý, qoǵamdyq optımızm: JOO-lardyń áleýmettik qorǵaý júıesiniń kadrlyq áleýetin arttyrýǵa qosqan úlesi» taqyrybyna arnaldy. Kezdesýdiń maqsaty – «Ádiletti Qazaqstandy» qurý jaǵdaıynda áleýmettik qorǵaý júıesiniń kadrlyq áleýetin arttyrýǵa ýnıversıtetterdiń úlesin kúsheıtý jónindegi strategııalyq baǵyttar men praktıkalyq sharalardy talqylaý.
Qatysýshylar áleýmettik jumys boıynsha ınnovasııalyq kadrlardy daıarlaý problemalaryn, ýnıversıtetterdiń qatysýymen áleýmettik qorǵaý qyzmetkerlerine úzdiksiz bilim berýdiń ózekti máselelerin, sondaı-aq jumys berýshilerdiń áleýmettik jumys salasyndaǵy bolashaq mamandardyń quzyretterin qalyptastyrýǵa qosqan úlesin talqylady.
«L.N. Gýmılev atyndaǵy EUÝ Áleýmettik jumys jónindegi bilim berý baǵdarlamalaryn belsendi damytýda. Biz túlekterimizdiń tereń kásibı bilimge ıe bolýyna ǵana emes, sonymen qatar olardyń kásibı qyzmet salasynda týyndaıtyn praktıkalyq máselelerdi sheshýge daıyn bolýyn qamtamasyz etýge tyrysamyz.Bilim berý úderisi aıasynda biz áleýmettik jumys boıynsha álemdik tájirıbeni zerdeleýge jáne ınnovasııalyq tásilderdi engizýge kóp kóńil bólemiz», dedi ýnıversıtet rektory Erlan Sydyqov.
Rektordyń aıtýynsha, EUÝ Áleýmettik jumys teorııasy men tájirıbesiniń úzdik standarttaryn engizýge baǵyttalǵan Frankfýrt jáne Shanhaı ýnıversıtetterimen «SOLID» halyqaralyq ǵylymı jobasyn júzege asyryp otyr.
Ýnıversıtet ǵalymdary sıfrlyq sheshimder arqyly halyqtyń osal toptarynyń máselelerin sheshýge arnalǵan «Sıfrlyq transformasııa jaǵdaıyndaǵy qazaqstandyq qoǵam: perspektıvalar men táýekelder» atty aýqymdy jobaǵa qatysyp otyr.
Sonymen qatar EUÝ men Eńbek jáne halyqty áleýmettik qorǵaý mınıstrligi birlesip áleýmettik saıasatty qoldaýǵa jáne onyń tıimdiligin arttyrýǵa baǵyttalǵan kásibı standarttar men bilim berý bastamalaryn ázirleý ústinde.
Ǵylym jáne joǵary bilim mınıstri Saıasat Nurbek álemde «ınklıýzııa» uǵymy qaıta qarastyrylyp jatqanyn atap ótti.
«Bul tek kedergisiz ortany qurý ǵana emes, fızıkalyq múmkindikteri joq kez kelgen adamdy nemese basqa shekteýleri bar adamdardy qosý. Dúnıejúzilik banktiń jobasy aıasynda biz pedagogıkalyq ýnıversıtetterdiń barlyq oqý baǵdarlamalaryn fın seriktesteriniń kómegimen qaıta qaradyq. Munda 30 jańa oqý baǵdarlamasy ázirlendi, ınklıýzııa negizgi prınsıp. Muǵalimderdiń jalpy massasyn bólek daıyndaýdyń ornyna, biz ár muǵalim ınklıýzııanyń ne ekenin túsinip, sertıfıkattalýy úshin bárin birdeı daıyndaýdy sheshtik. Osy joba aıasynda 25 ýnıversıtet arnaıy kabınettermen jáne zertteý keshenderimen jabdyqtaldy», dedi mınıstr.
Eńbek jáne halyqty áleýmettik qorǵaý vıse-mınıstri Asqarbek Ertaev áleýmettik jumys júıesin damytýdyń negizgi vektorlaryna toqtaldy.
«Búginde Qazaqstanda 35 myńnan astam áleýmettik qyzmetker jumys isteıdi. Áleýmettik qyzmetkerlerdiń tek 12% ǵana mamandandyrylǵan bilimge ıe, bul olardyń belsendi daıarlyǵy men jańa mamandardyń qajettiligin kórsetedi. Kadrlardyń sapasyn arttyrý úshin bıyl halyqaralyq standarttardy eskere otyryp, kásibı standarttar ázirlendi. Bıyl 8,5 myńnan astam áleýmettik qyzmetker mamandandyrylǵan oqýdan ótti. Kelesi jyldan bastap áleýmettik sala mamandary elimizdiń 14 joǵary oqý ornynda qaıta daıarlaýdan jáne biliktiligin arttyrýdan óte alady. Biz Eýrazııa ulttyq ýnıversıtetimen de memorandýmǵa otyrdyq», dedi vıse-mınıstr.
Kezdesý barysynda EUÝ-dyń áleýmettik-mádenı damý jónindegi prorektory Lázat Tólegenqyzy da ýnıversıtettiń áleýmettik qyzmetkerlerdi daıarlaýdaǵy ınnovasııalyq áleýetine toqtaldy.
Astanalyq balalar men otbasyn qoldaý ortalyǵynyń basshysy Marııa Shýbına bilim berý baǵdarlamalary túlekteriniń áleýmettik jumystaǵy quzirettiligine jumys berýshiniń kútýi men qosatyn úlesi týraly aqparatpen bólisti.
EUÝ sıfrlyq damý sektorynyń menedjeri Altynbek Zulhajav kórý qabileti nashar adamdarǵa arnalǵan «Inklıýzıvti gıd» navıgasııalyq júıesin tanystyrdy.