Memleket basshysynyń Jarlyǵymen tótenshe jaǵdaı kezinde sheshýshi áreketke barǵany úshin Qorǵanys mınıstrligi 30153 áskerı bóliminiń alys radıomarker pýnkti bólimshesiniń bastyǵy Nurlan Botaǵarın Rahymjan Qoshqarbaev atyndaǵy III dárejeli «Aıbyn» ordenimen marapattaldy.
Aqtaýda kishi serjant Nurlan Botaǵarınge Mańǵystaý oblysynyń ákimi Nurdáýlet Qılybaı laıyqty marapatyn saltanatty túrde tabys etti.
Sóz kezegi Nurlan Botaǵarınge kelgende, ol ushaq apatynan qaza tapqan adamdardyń týǵan-týystaryna kóńil aıtty. Marapatqa alǵysyn bildirgen áskerı qyzmetshi ózin batyrmyn dep sanamaıtynyn alǵa tartty.
«Meniń ornymda kez kelgen adam osylaı áreket eter edi. Sol sátte meniń oıymda ómir men ólimniń arasynda qalǵan jandardy arashalap alyp qalý ǵana boldy», dedi ol.
Fotoǵa túsip qalǵan áskerı adamnyń keskini – Aqtaý mańyna ázerbaıjandyq Azal avıakompanııasynyń ushaǵy qulaǵan jerde kishi serjant Nurlan Botaǵarınniń bolǵanynyń dáleli.
Apatqa ushyraǵan ushaq jolaýshylaryn qutqarǵany týraly Qorǵanys mınıstrligi 30153 áskerı bóliminiń alys radıomarker pýnkti bólimshesiniń bastyǵy kishi serjant Nurlan Botaǵarın únsiz qalýdy jón kórdi.
Degenmen BAQ-ta jarııalanǵan sýretterde jaýyngerdi Saıyn Shapaǵatov aýylynyń turǵyndary tanydy. Birte-birte oqıǵa ornynda alǵashqy bolyp jetken adam QR Áskerı-áýe kúshteri avıasııalyq bazasynyń áskerı qyzmetshisi kishi serjant Nurlan Botaǵarın ekeni belgili boldy.
Kólikpen bir shaqyrym qashyqtyqty júrip ótip, ol áýe kemesi apatqa ushyraǵannan sátte birden oqıǵa ornyna jetedi.
Qaıǵyly jaǵdaı oryn alǵan kúnin eske qaıta túsirý qıyn. Onyń esinde dalada aq kúrteshe kıgen qyzdyń beınesi qalyp qoıǵan. Osy kezde ol birden aman qalǵandar bar-aý dep oılaıdy. Qyzdyń aman-saý ekenine kóz jetkizgen soń ony jaqyndap kele jatqan kólikterge jiberedi de Nurlan Botaǵarın qıraǵan áýe kemesiniń ekinshi bóligine qaraı júgiredi. Tóńkerilgen avıalaınerdiń korpýsyna kóterilip, ol ishke kiredi.
Kórgendi sózben jetkizý qıyn árıne, aýyr jaraqattary bar, ashyq synyqtary bar adamdar yńyrsyp, eseńgirep jatty.
Birinshi sátte Nurlan Botaǵarın olarǵa zııan keltirmeı qalaı kómektesýge bolatynyn oıladym deıdi. Alaıda birte-birte zardap shekkenderdi shyǵaryp alyp, olardy Mańǵystaý elektr jelilik kompanııasynyń qyzmetkerlerine bere bastady. Osylaısha ol salonnan on shaqty jolaýshyny shyǵarady.