2024 Olımpıada jyly bolýymen de este qaldy. El atletteri Parıjde jeti júlde qanjyǵalady. Kóńildi kókke kóteretin nátıje bolmaǵanmen, Tokıo Olımpıadasynyń qorytyndysynan táýir. Jańa beleske jetý úshin ótken synda súringen sátten sabaq alý mańyzdy. Bul tujyrym elge bos qaıtqan erkin kúresshilerge de qatysty bolyp otyr. XXXIII jazǵy Olımpıada oıyndarynda balýandardyń Olımp shyńyn baǵyndyra almaýynyń sebebin 2000 jyly Sıdneı tórinde kúmispen kúptelgen erkin kúres sheberi Islam Baıramýkov atap berdi, dep jazady Egemen.kz.
- Islam Ilııasuly, balýandarymyz Parıjdegi tórtjyldyqtyń basty dodasyn bir kúmispen qorytyndylady. Grek-rımde Demeý Jadyraevtyń kúmisi kóńilge medeý bolǵanmen, erkin kúres sheberlerinen de el júlde kútkeni jasyryn emes. Jurttyń osy tileginiń oryndalmaýyna ne sebep boldy?
- Ras, Parıj olımpıadasynyń nátıjesi oıdaǵydaı bolmady. Grek-Rımde Demeý Jadyraev top jardy. Altynǵa bir qadam jetpeı, súringeni eriksiz áttegen-aı degizedi. Al erkin kúreste nátıje joq. Bolashaqta iri básekelerde taǵy qapy qalmaý úshin jeńilisten jaqsy sabaq alýy shart. Elimizdiń kúresine ózgerister engizetin ýaqyt jetti dep oılaımyn. Tıisti federasııa, bapkerler quramy durys baǵytta jumys bastaýy tıis. Halqymyz «Shymshyq soısada qasapshy soısyn» deıdi. Menińshe, sportshylardy baptaıtyn mamandar kúrestiń naǵyz jiligin shaǵyp, maıyn ishkender bolýy kerek. Jeke pikirim boıynsha, balýandarǵa baǵyt jan-jaqty berilmegen. Bizdiń sportshylar tek aıaqqa jumys isteıdi. Keýdeden asyrmaıdy, jambasqa laqtyrmaıdy, ıyqtan asyryp laqtyrmaıdy, qolda jumys isteý degen joq. Asylynda, kúrestiń qyr-syry kóp. Aıaqtan ustaý, belden ustaý, keýdeden, ıyqtan asyrý syndy baǵyttar jetkilikti deńgeıde qamtylmaı, jeńis te qolǵa túspeıdi.
- Osy oılaryńyzdy Olımpıada tusynda tikeleı efırde ortaǵa saldyńyz. Dese de kásibı maman, kúres janashyry retinde sportshylarmen jeke tildesip, kem ketken tustaryn aıta aldyńyz ba?
- Iá, Qazaqstan kórermenderi kúresti erekshe yqylaspen tamashalaıdy. Memleketimizdiń namysy synǵa túsken kezeńde janyńdy sala, tabandylyqpen kúresý kerek. Keı balýandarymyzdyń beldesýine kóńilimiz tolmaı jatty. Tikeleı efırde emosııany jasyrý da múmkin emes. Onyń syrtynda tilektes nıet jatqany túsinikti dep oılaımyn. Estir qulaqqa sol sátte-aq bilgenimizdi búgip qalmaı aqtaryp saldyq. О́zim sportshylardy tárbıeleýmen aınalysýǵa den qoıdym. Mundaı múmkindikke Respýblıkalyq sport kolledjin basqarý arqyly ıe bolyp otyrmyz. 2024 jyldyń sáýirinen osy qyzmetke taǵaıyndalǵaly joǵaryda túıgen birshama qatelikterdiń aldyn alýǵa kúsh salyp jatyrmyz. Shákirtterimizdiń aıaq alysyn kúni-túni baqylaımyz, ishken asyna deıin qadaǵalaımyz desem artyq emes. Tipti dalaǵa jeńil shyqsa da syrttaǵy temperatýraǵa saı kıinýin talap etemiz. Munyń bári jeńisti jolǵa bastaıtyn - tártip.
- Bilýimizshe, ózińiz de osy qarashańyraq Respýblıkalyq sport kolledjiniń túlegisiz. Keı sátterde jurtshylyq sportshylardyń laýazymdy qyzmettiń tizginin tartqanyna synı kózqaraspen qarap jatady. Osy týraly sizdiń pikirińiz qandaı?
- Menińshe, kim bolsa da sol salanyń ishki júıesin jaqsy bilse, aıryqsha nazar aýdaratyn másele joq dep oılaımyn. Árıne, tájirıbe de kerek. Basshy jumysynyń nátıjesi 1-2 jylda-aq kórinedi. Bul oraıda sportshylarǵa da nege múmkindik bermeske?! Halyqtyń kókeıinde «ana sportshy qaıda júr eken, myna chempıon qandaı ispen aınalysyp júr eken?» degen saýal týyp jatady. Sportshylar ózi júrip ótken jol bolǵandyqtan qurama komanda, federasııa, aýyl-aımaqtardaǵy sportty basqarý komıtetteri bolsyn, barlyq jerde jumys istep kórýi kerek. Al olardy qoldaıtyn tájirıbesi tolysqan maman janynda bolsa nur ústine nur. Keıde qaǵazǵa qatysty jumystardy retteý kútip turady. Sondaı sátterde qoldaý, baǵyt nusqaý mańyzdy.
- Sóz sońynda ózińizdi jeńiske jetelegen tásilderdi bólisińizshi.
- Qarsylasyńdy jek kórýiń kerek. Bul - sporttyń zańy. Men qarsylastarymmen amandaspaıtyn edim. Sálemdesip turǵanda syryńdy aldyryp qoıýyń bek múmkin. Qaı jeriń aýyryp tur, ózińdi qalaı sezinip turǵanyńdy bilip alyp, qarsy tásil qoldanýy da ǵajap emes. Qaı deńgeıde bolsyn qarsylastarmen dostasyp, qushaqtasyp júrýge bolmaıdy. Pikirimdi oqýshylar jaqsy oımen aıtyp jatqanymdy túsine jatar. Keıde jattyǵýda qurama balalary bir-birimen amandasyp, qushaqtasyp jatqanda, ysqyryq shalyp toqtatyp, «qushaqtasyp, amandasyp jatsańdar bozkilemde qandaı qarsylyq kórsete alasyńdar», dep eskertip jatamyn. Qandaı deńgeıli jarys bolsa da qarsylasyńa jaý sekildi qaraý kerek. Sonda ǵana jeńis tuǵyryna kóterilýge bolady.
- Áńgimeńizge raqmet!