Májilis spıkeri Erlan Qoshanovtyń tóraǵalyǵymen bıýro ótip, aldaǵy jalpy otyrystyń kún tártibi naqtylandy.
Birinshi oqylymda Májilis taýarlardyń shyǵarylǵan elin aıqyndaý máseleleri boıynsha zań jobasyn talqylaıdy. Bul zań jobasy Prezıdenttiń 2023 jylǵy 1 qyrkúıektegi Joldaýynda aıtylǵan tapsyrmalaryn iske asyrý maqsatymen daıyndalǵan. Zań jobasy otandyq óndiristi damytý, ımporttyq jetkizilimderge táýeldilikti azaıtý jáne jańa óndiristerdi lokalızasııalaý úshin usynylyp otyr. Osy maqsatta «ST-KZ» nysanyndaǵy qoldanystaǵy sertıfıkattar men ındýstrıaldy sertıfıkatty aýystyratyn Qazaqstannan shyqqan taýarlardyń reestrin qurý usynylady.
Ekinshi oqylymda depýtattar rezervtegi qyzmet máseleleri boıynsha zań jobasyn talqylaıdy. Zań jobasymen jańa áskerı qyzmet túri – rezervtegi qyzmet engiziledi. Bul kelisimshart negizinde turǵylyqty jeri boıynsha erikti túrde júzege asyrylady jáne áskerı daıyndyqty arttyrý úshin rezervtik kúshterdi qurýdy maqsat etedi.
Sonymen qatar depýtattar Túrkııa Respýblıkasymen ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkasııalaý jónindegi zań jobasyn qaraıdy. Májilis kásibı parasattylyqqa testileý týraly, ekologııalyq máseleler boıynsha jáne birqatar halyqaralyq kelisim boıynsha usynylǵan zań jobalaryn jumysqa alýdy josparlap otyr.