«Bıyl qańtar aıynda jaýyn-shashyn mólsheri byltyrǵydaı boldy. Qazir Tasqala, Syrym, Bórli, Terekti, Báıterek aýdandarynda, Oral qalasynda topyraqta qalyńdyǵy 2 sm toń paıda boldy. Aýa raıy kúrt jylyp, jańbyr mol jaýatyn bolsa, naýryz aıynda bul sý tasqynyna soqtyrýy yqtımal», dep habarlaıdy «Qazgıdromet» qyzmeti Batys Qazaqstan oblystyq fılıalynyń dırektory Tilegen Shapanov.
Batys Qazaqstan óńirinde kóktemgi sý tasqyny bıyl da bolýy múmkin degen boljam buryn da aıtylǵan edi. Sondyqtan oblysta tabıǵat synyna daıyndyq qyzý júrip jatyr. Jaz boıy Jaıyq ózeniniń jaǵalaýy bekitilip, sý basý qaýpi bar aýmaqtarda jalpy uzyndyǵy 102 shaqyrym bolatyn 54 qorǵanys bógeti turǵyzyldy. Tótenshe jaǵdaı týa qalsa, jumyla ketýge 1817 tehnıka, 4 myńnan astam maman saqadaı-saı tur.
Oblys ákimdiginiń baspasóz qyzmeti habarlaǵanyndaı, kóktemgi sý tasqynyna qarsy daıyndyq jumysy byltyrǵy sý tasqyny zardaptaryn joıý isimen birge júrdi. Mamandar jaz kezinde-aq qaýipti jerlerdi zerttep, sonyń nátıjesinde aldyn alý jumystaryn júrgizý maqsatynda arnaıy Jol kartasy ázirlendi.
Jaqynda oblys ákimdiginde kóktemgi tasqynǵa daıyndyq barysyn pysyqtaǵan taǵy bir jıyn ótti. Oblys ákimi Narıman Tóreǵalıev bul máseleniń Memleket basshysynyń tikeleı baqylaýynda ekenin atap ótti. Basqosýda sý basý qaýpi bar aýmaqtarda tasqynnyń aldyn alýǵa daıyndyq barysy jóninde jaýapty tulǵalar esep berdi. Sonyń ishinde sý qoımalary men toǵandardyń jaǵdaıy erekshe baqylaýǵa alynǵan. Qazir barlyq sý ótkizetin arnalardyń tazalyǵy pysyqtalyp jatyr. Yqtımal sý tasqynyn joıýǵa arnalǵan kúsh pen quraldardyń, qorǵanys bógetteriniń daıyndyǵy kún tártibinde tur.
«Kóktemge barynsha daıyn bolýymyz kerek. Sý tasqynynyń aldyn alý sharalaryn sapaly júrgizý qajet. Oral, Aqsaı qalalary men barlyq aýdan ákimderine, tıisti mekeme basshylaryna osy jumysty kúsheıtýdi eskertemin», – dedi oblys ákimi N.Tóreǵalıev.
Batys Qazaqstan oblysy