ASTANA. 1 mamyr. Atyraý qalasynyń polıseıleri kópirden Jaıyq ózenine sekirgen jigitti qutqaryp qaldy. Bul týraly «Moı Gorod» habarlady.
Atyraý oblystyq ishki ister departamenti baspasóz qyzmetiniń jetekshisi Gúlnazıra Muhtarovanyń aıtýynsha, ózine qol jumsamaq bolǵan jigitti eki polıseı qutqaryp qalǵan. Tártip saqshylary kópirdiń mańynan ótip bara jatyp, 25-30 jas aralyǵyndaǵy azamattyń ózenge sekirgenin baıqaǵan. Olar birden jigitti qutqarýǵa umtylǵan. Nátıjesinde podpolkovnık Bolat Dıýsenov sýǵa sekirip, ony jaǵaǵa alyp shyqty. Al qasyndaǵy podpolkovnık Murat Demegenov jedel járdem men polıseılerdi shaqyrǵan.
Aıta keteıik, tergeý barysynda jigit 1983 jyly týǵan, Atyraý qalasynyń turǵyny ekeni anyqtaldy. Sondaı-aq, ol júıke aýrýlar despanseriniń esebinde turǵany da belgili boldy. Dárigerlerdiń kómeginen keıin tártip saqshylary jigitti týystaryna tapsyrdy.
Talǵat Raıymbek.
Derek, sýret: «Moı gorod».