Júrekke ájim túspeıdi

Júrekke ájim tús­peı­di... Shynymen de, osy bir-aq aýyz sóz áńgimeni oqyǵan ár oqyr­mannyń júregine ósh­pesteı jazylary anyq. О́zi­niń de ótkenin (bálkim bú­gingi kúıin), ómirindegi sáý­leli sátter men júreginiń túkpirinde aıalaǵan (múmkin jasyrǵan) appaq armandaryn alaqanyna salyp, bir sátke jan tereńine úńilip, tolǵanary haq. Sonda ózi de alystaǵy Enjesin saǵynyp, ǵumyr boıy ǵashyǵyna yntyqqan Saǵyn aqsaqaldyń appaq álemi men ishki tolǵanystarynyń ishine túsip ketkendeı sózben aıtyp jetkizgisiz sumdyq bir sáýleli sezimdi bastan kesheri sózsiz. Sebebi júregi bar pendeniń qaı-qaısysynyń da myna ómirde mahabbatqa bir jolyqpaı ketkeni (ótkeni) joq shyǵar. Al seksenge kelip te sezimine selkeý túsir­meı, adamdyq aryna adal bola alý – úlken erlik. Ondaı qasıet tek júregi taza, jany kir­shiksiz jandardyń mańdaıyna buıyrǵan baq bolsa kerek.

Esińizde me, Saǵyn aqsa­qal­dyń: «Ýaqyt, kóp bolsa, seniń betińdi ájim­degen shyǵar, al júrekke ájim túspeıdi» degen bir-aq aýyz sózine qansha maǵyna, tipti ómirdiń búkil pál­sapasy syıyp jatqan joq pa? Osy sózdi aıtqan keıipkerdi qalaı kemeńger, aıtqyzǵan jazýynyń júregin qalaı ǵarysh demessiń?

Jalpy, Sherhan Murta­za­nyń jazýshy retinde, ásirese áńgime jazý­daǵy sheberligi osyn­daı kóńildiń ishki ıirim­derin asqan sezimtaldyq hám suń­­ǵylalyqpen sezine otyryp, sodan ómir­diń ólmeıtin qundylyqtaryn áspetteı alǵanynda, baıyppen baıqaı bil­gendiginde jatsa kerek. Áıtpese júrek deıtin bir kesek et bárimizde de bar ǵoı. Al soǵan ájim túsirmeı, kóńil kózin kirletpeı ómir boıy ony ásem­dik pen tazalyqqa baǵysh­taı alǵanymyz qaısy?

«Aýrý adamdaı meń-zeń halge dýshar boldym. Bozym boz­bala shaqqa qa­ı­ta oral­­ǵan­­d­aı, júregi túskir tátti bir se­zim­­nen ýyljyp qoıa berdi. Adam qar­taısa bala bolady, deýshi edi buryn­ǵy­lar. Sol ras, «bala boldym ba?» deı­­min ózime ózim. Biraq esil-der­­tim Enjede. Qar­taı­ǵanda qara basty ma, munsha tolqyp, to­pa­lań tıgendeı alasurǵan ne deı­min».

Áńgimedegi Saǵynnyń osy bir sózi-aq shyn súıgen jan­nyń kóńili máńgilik kóktem, jany jaıqalǵan jaz ekendi­gin uq­tyrmaı ma? Demek júrekke de ájim túsirmeý osyndaı adal sezim, aq adal peıilmen astasyp jatsa kerek, bizdińshe. Iá, mynaý appaq ǵalamda pen­deliktiń, turmystyń tusaýyna byl­ǵan­baı, ǵalamnyń ǵajabyn kókirek kózimen kóre alýdyń ózi de teń­dessiz tartý shyǵar. Áıtpese sek­senge kelmeı-aq sezimin sýytyp, júregin kirletkender qa­tarymyzda qanshama? Bul ala­ǵaı da bulaǵaı shaqta júre­gin saqtaı alǵandar – shyn ba­qyt­tylar!