Sot ákimshiligi basshysynyń birinshi orynbasary Shákir Shaıahmetov jumys sapary aıasynda birqatar óńirlerde bolyp, sot ınfraqurylymynyń jaı-kúıimen, jóndeý-qurylys jumystarynyń barysymen tanysty, sondaı-aq sot qaýymdastyǵymen kezdesýler ótkizdi, dep habarlaıdy Egemen.kz.
Shákir Shaıahmetov Abaı oblysynda sot organdarynyń, sonyń ishinde Borodýlıha aýdandyq sotynyń ǵımarattarynyń jóndeý jumystaryn tekserdi.
Ol SÁ oblystyq departamenti basshylyǵynyń nazaryn úı-jaılar men jabdyqtardy jańartyp qana qoımaı, sýdıalarǵa, sot qyzmetkerlerine jáne kelýshilerge qolaıly jaǵdaı jasaý qajettiligine aýdardy.
Barlyq jumystardyń merziminde jáne sapaly aıaqtalýyn qadaǵalaýdy kúsheıtýdi talap etti.
Qaýipsiz dep tanylǵan Aqmola oblysynyń Atbasar aýdandyq sotynyń ǵımaratynda bolǵan Shákir Shaıahmetov SÁ oblystyq departamentiniń basshylyǵymen kezdesýde tótenshe jaǵdaılardyń aldyn alý sharalaryn, sondaı-aq sot ǵımaratyn jalǵa berý nusqalaryn talqylady.
«SÁ Qostanaı oblystyq departamentiniń basshylyǵymen aýdandyq sottardyń ǵımarattary tekserilip, olardyń materıaldyq-tehnıkalyq bazasyn jańǵyrtý máseleleri, onyń ishinde aýdanaralyq sot qurý máselesi talqylandy. Altynsarın aýdany, Qostanaı qalasynyń N2, MAES jáne oblystyq sottardyń sýdıalarymen jáne mamandarymen kezdesýler barysynda sot isin júrgizýdegi IT-tehnologııalardy damytý jáne sottardy materıaldyq-tehnıkalyq qamtamasyz etýdi jaqsartý máseleleri týraly sóz boldy», delingen habarlamada.
Sot ákimshiligi basshysynyń birinshi orynbasary kezdesýlerde áriptesteriniń jumysynyń jaýapkershiligi zor ekenin atap ótip, sot ákimshiligi máselelerin der kezinde sheshýdiń mańyzdylyǵyn aıta kele, sot qyzmetkerlerin kelýshilermen sóıleskende olardyń tilekterin tyńdaýǵa jáne sot ákimshiligi qyzmetiniń sapasyn arttyrý úshin qoldan kelgenniń bárin jasaýǵa shaqyrdy.