Qyzdardyń qarqyny qýantty

Álemniń kóptegen mem­le­ketinen kelgen beldi balýandardyń qa­ty­sýymen ótken básekede áıel­der kúresinen elimizdiń qurama komandasy tolaǵaı tabysqa qol jetkizdi. Ásirese aýyr, asa aýyr salmaqtarda kúresken qos bu­rymdymyz asqan sheberligi­men tánti etti. Atap aıtqanda, 72 kg salmaqtaǵy Jámıla Baqber­genova barlyq qarsylasyn qapy qal­dyryp, fınalda Qaıyr­gúl Shar­shebaevanyń 8:1 esebi­men tas-talqanyn shyǵardy. 29 jas­taǵy balýannyń óreli ónerine barsha jan­kúıer dán rıza. Ol qatysqan jarys­tarynyń barlyǵynan oljaly oralyp júr. О́zge tabystaryn aıtpaǵanda, álem chempııonatynda 3 kúmis, 1 qola alyp, Azııa oıyndarynyń fınalısi boldy. Qurlyq birinshiliginde bas júldeni úsh márte oljalap, eki ret júldegerler sanatyna qo­syldy. Buǵan deıin birde-bir qazaq qy­zyna ondaı bıik belester baǵyn­ba­ǵan. Barsha Alash jurty aldaǵy ýa­qytta da Jámılanyń jeńisti jo­ly­nyń jalǵasýyna tilektes.

76 kg salmaqta synǵa túsken Elmıra Syzdyqova da el seni­min aqtady. Kezinde ol Rıo Olım­pıa­­dasy men Djakartadaǵy Azııa oıyn­­darynda qola medaldy ıele­nip, qurlyqtyń basty dodasynda 8 ret (2 altyn, 2 kúmis, 4 qola) jeńis tuǵyryna kóterildi. Jasy 33-ke kelse de, Syzdyqova óziniń áli de babynda ekenin taǵy bir dáleldedi. Aınaldyrǵan bir jyl aralyǵynda asa iri úsh týrnırde top jarǵan Qaraǵandy oblysynyń ókili Medvedtiń memorıalynda da aldyna jan salmady. Mınskide bes kezdesý ótkizgen Elmıra bar­lyǵynda basymdyq tanytyp, altyn­nan alqa taqty.

Irına Kýznesova (59 kg) kúmis­pen kúpteldi. Fınalǵa deıin esh ke­dergisiz jetken ol sheshýshi tusta belarýstyq Alesıa Getmanovadan jeńildi. Zeınep Baıanova (53 kg), Zúlfııa Iаhıarova (55 kg), Tynys Dýbek (62 kg), Elena Shalygına (65 kg) qola medaldy qorjynǵa saldy.

О́kinishke qaraı, erkin kúres sheberleriniń boıynan qyz­dar­di­kindeı qarqyn men jeńiske degen qulshynys baıqalmady. Jarys jolyna shyqqan eki ba­lýa­nymyzdyń ǵana jeńis tu­ǵyryna kóterilýge kúsh-jigeri jetti. 65 kg salmaqtaǵy Ádil Os­panov fınalǵa deıin alqynbaı jetkenimen, daǵystandyq Eldar Ahmadýdınovten aılasyn asyra almady. Jartylaı fınalda jeńilgen Serik Baqythanovtyń (125 kg) úshinshi oryn úshin bá­sekede Qap taýynyń taǵy bir ókili Magomed Magomedovten me­reıi ústem boldy.

Aleksandr Medved memo­rıa­lynyń jeńimpazdary:

57 kg – Musa Mehtıhanov (Da­ǵystan), 61 kg – Emrah Ormanoǵly (Túrkııa), 65 kg – Eldar Ah­ma­dýdınov (Daǵystan), 70 kg – Qur­ban Shıraev (Daǵystan), 74 kg – Inalbek Sherıev (Máskeý oblysy), 79 kg – Abdýlkerim Abdýlaev (Orynbor), 86 kg – Amanýla Rasýlov (Daǵystan), 92 kg – Mustafagadjı Malachdıbırov (Daǵystan). 97 kg – Aleksandr Gýshtyn (Belarýs), 125 kg – Denıs Hromenkov (Belarýs).