Qazgıdromettiń málimetine qaraǵanda, Aqtóbe qalasy men Áıteke bı, Muǵaljar, Qarǵaly, Mártók, Qobda aýdandarynda jerdegi tońnyń qatýy ótken jylǵydan eki ese joǵary bolǵandyqtan, óńirde kóktemgi sý tasqyny qaýpi joǵary. Osy másele tótenshe jaǵdaılardyń aldyn alý jáne joıý jónindegi oblystyq shtabtyń kezekten tys otyrysynda talqylandy, dep jazady Egemen.kz.
Aqtóbe qalasynda Elek jáne Qarǵaly ózenderi jaǵasynda ornalasqan 60 baý-baqsha ujymynyń turǵyn úılerin sý basý qaýpi bar. Eger byltyrǵydaı qar tez erip, sý ózen arnalarynan asyp, turǵyndarǵa qaýip tóndirer bolsa, adamdardy ýaqytsha ornalastyrýǵa 6 evakýasııalyq ortalyq daıyndaldy. Bul kúnderi Peschanka ózeniniń jaǵalaýyn bekitý jumystary júrip jatyr.
Byltyrǵy jaǵdaı bıyl qaıtalanbaýy úshin ózen seńderin buzý jumystary naýryzdyń alǵashqy kúnderi bastalady. TJD qyzmetkerleri Aqtóbe qalasy, Áıteke bı, Baıǵanın, Yrǵyz, Muǵaljar, Oıyl, Hromtaý aýdandarynda dalalyq ózenderge jarylys jumystaryn júrgizedi. Bul erigen qar sýymen qosylǵan ózen muzdarynyń kedergisiz ótip ketýine yqpal etedi. Sondaı-aq aldaǵy aptada aryqtar men kanaldar, bógetter, tasjoldardaǵy sý ótkelderin qar men muzdan, qoqystan tazartý jumystary bastalady.