Bul týraly Prezıdent Ulttyq quryltaıdaǵy sóılegen sózinde aıtty, dep habarlaıdy Egemen.kz Aqordanyń baspasóz qyzmetine silteme jasap.
«Dmıtrıı Pavlenko durys másele kóterdi. Kásibı tehnıkalyq kolledjder jańa mamandyqtarǵa suranysty jáne eńbek naryǵyndaǵy jaǵdaıdy eskerýge tıis. Sarapshylardyń aıtýynsha, biraz jyldan soń soltústiktegi halyqtyń sany edáýir azaıyp, ońtústiktegi turǵyndar áldeqaıda kóbeıýi múmkin. Bul – óte ózekti másele. Sebebi aımaqtardyń eńbek naryǵynda teńsizdik odan ári ýshyǵa túsedi degen sóz. Osy máselemen Úkimet muqııat aınalysýy kerek. Qostanaıdaǵy kolledjdiń tájirıbesin soltústik aımaqtarda keńinen qoldaný qajet», dedi Memleket basshysy.
Sondaı-aq Prezıdent quryltaı músheleri ózekti máselelerdi árdaıym kóterip júrgenin aıtty.
«Jalpy quryltaı músheleri qoǵamdaǵy ózekti máselelerdi únemi kóterip júr. Bárin synap-minep otyratyn bázbireýler basty túıtkil – bul emes, memleket nazar aýdarýǵa tıis basqa da problemalar bar deýi múmkin. Azamattarymyz kúndelikti tirshilikte kóptegen qarapaıym túıtkilge tap bolady. Ony elemeı, nazardan tys qaldyrý durys emes ekenin eskergen jón. Biz azamattardyń turmysyna qatysty máselelerdi aldaǵy ýaqytta da kóteremiz, eń bastysy, bul problemalardy sheshetin bolamyz», dedi Prezıdent.