Aqtóbe óńirinde jalpyulttyq Naýryznamanyń onkúndigi aıasynda birqatar shara uıymdastyrylyp jatyr. Oblys ortalyǵynda 14 naýryz Kórisý kúnine oraı, «Amal keldi – jyl keldi» atty merekelik baǵdarlama ótti, dep habarlaıdy Egemen.kz.
Is-sharanyń ereksheligi sol – aq kımeshek kıgen 100 áje jáne aq oramaldy 100 kelin Aqtóbe kóshelerimen júrip ótip, turǵyndardy tańǵaldyrdy.
Merekelik baǵdarlama qazaq mádenıetinde aıyryqsha oryn alatyn, urpaqtan-urpaqqa jalǵasyp kele jatqan mańyzdy dástúr «Bastańǵy» kórinisimen bastaldy. Ári qaraı kósh kerýenimen ulasty. Tarıhymyz ben mádenıetimiz sán-saltanat qurǵan kósh-kerýendi «Qazaq analary – dástúrge jol» qoǵamdyq birlestigi, Aqtóbe oblystyq fılıalynyń analary, Almaty aýdanynyń analar keńesi, analar alqasy, Almaty aýdandyq aqsaqaldar alqasy bastady.
Aqjaýlyq ájeler alańda jınalǵan jurtpen amandasyp, Kórisý dástúrin kórsetti, kelinder úlkenderge sálem etti.
Ulttyq qundylyqtarymyz dáriptelgen shara sońynda aqtóbelikter jaıylǵan dastarqannan, Naýryz kójeden dám tatty. Odan bólek, ulttyq oıyndar men sporttyq jarystarǵa qatysyr, kóterińki kóńil-kúımen tarqasty.