«Jaıly mektep» ulttyq jobasy sheńberinde 460 myń oryndyq 217 mektep paıdalanýǵa beriledi. Byltyr jańa formattaǵy 105 mektep esigin aıqara ashsa, bıylǵy jyl sońyna deıin taǵy 112 jaıly mekteptiń qurylysyn aıaqtaý josparlanyp otyr, dep habarlaıdy Egemen.kz.
Sonymen qatar, aýdan ortalyqtary men aýyldarda 1 myń mektepti modernızasııalaý 7 baǵyt boıynsha jalǵasyp jatyr. Sońǵy 3 jylda 4 myńnan astam mekteptiń materıaldyq-tehnıkalyq bazasy jańartylyp, 2 myńnan astam mektepke STEM, fızıka, bıologııa, hımııa, robototehnıka zamanaýı kabınetteri ornatylǵan.
Oqý-aǵartý mınıstrliginiń baspasóz qyzmetiniń málimdeýinshe, mańyzdy qadamdardyń biri – 2023 jyly Bilim berý ınfraqurylymyn qoldaý qorynyń qurylýy boldy. Ol jemqorlardan tárkilengen qarjy esebinen tolyqtyrylyp keledi. Sonyń arqasynda 100 myń oqýshy ornyna arnalǵan 89 mekteptiń qurylysy qarjylandyryldy. Onyń 74,4 myń oryndyq 61 mektebinde búginde balalar bilim alyp jatyr.
Kelesi qadamdardyń biri mektep ınfraqurylymdaryn biryńǵaı formatqa keltirý bolmaq. Ol úshin Memleket basshysynyń tapsyrmasymen 1300-ge jýyq mektep renovasııadan ótedi. Onyń ishinde 900 aýyl mektebi bar. Joba 3 jylǵa josparlanǵan jáne 9 basty baǵyt boıynsha júzege asyrylady. Onyń sheńberinde mektepterdiń shatyrlary aýystyrylady, syrtqy qasbetteri, terezeleri jańartylady, ınjenerlik kommýnıkasııa jelileri kúrdeli jóndeýden ótedi. Sondaı-aq mektep aýmaǵy abattandyrylyp, kógaldandyrylady.