Memleket basshysy jańa jumys oryndaryn qurý, eńbek naryǵyn qajetti mamandyqtarmen qamtamasyz etý boıynsha naqty talap qoıdy. Osy baǵytta Shymkent qalasy ákimdigi shahardaǵy 40 kolledj dırektorymen máseleni talqylap, ony sheshý jolyn zerdeledi.
Aldyn ala júrgizilgen zertteý nátıjesinde óńirdegi mádenıet oshaqtarynda dekorasııa qoıýshy, býtafora ázirleýshi, dybys, jaryq qoıatyn mamandarǵa suranys bar ekeni anyqtaldy. Al qalada bul mamandyqtar birde-bir oqý ornynda daıarlanbaıdy. Sondyqtan Á.Qasteev atyndaǵy Shymkent qalalyq óner jáne dızaın kolledji men Saz kolledjine osy mamandyqtarǵa biliktilik sanatyn alyp, baǵdarlama qurý boıynsha tapsyrma berildi. Sonymen birge ákimdik tarapynan tehnıkalyq mamandyqtarǵa bólinetin grant sany kóbeıdi. Qala ákimdigi júrgizgen kelissóz aıasynda birneshe kásipker 53 stýdentti ózderiniń esebinen tegin oqytyp, jumysqa ornalastyrmaq.
Sondaı-aq óńirlik Kásipkerler palatasy jyl saıyn eńbek naryǵyndaǵy jumysshy mamandyqtar suranysyn saralaý úshin kásiporyndar arasynda saýalnama uıymdastyrady. Onyń qorytyndysy jergilikti bıýdjetti bekitý barysynda esepke alynady. Byltyrǵy saýalnama aıasynda 4 myńǵa jýyq bıznes ókili qamtylyp, megapolıste 16 myńnan astam jumysshy mamandyǵyna tapshylyq bary anyqtalǵan. Negizinen qurylys, óńdeý ónerkásibi, densaýlyq saqtaý, halyqqa áleýmettik kórsetý salalary jumysshy mamandyqtaryna kóbirek muqtaj eken.
Shymkent qalalyq Kásipkerler palatasy ókilderi dýaldy oqytý júıesin jetildirý kerektigin aıtady. Bul úshin arnaıy usynystar ázirlegen. Onyń eń basynda oqý oryndary men kásiporyndardyń baılanysyn nyǵaıtý máselesi tur. Ásirese dýaldy oqytý baǵdarlamalaryn qarjylyq qoldaý, keri baılanysty paıdalana otyryp, dýaldy bilim berý sapasyn monıtorıngileý jáne baǵalaý júıesin engizý mańyzdy. Bul qadamdar mamandardy daıarlaý sapasyn arttyrmaq.
Kásiporynda aılyq joǵary bolsa oqý bitirgen túlek mindetti túrde sonda qalýǵa tyrysady. Sondyqtan kásipkerler palatasy ókilderi memleket jumys oryndaryn sýbsıdııalasa degen usynys aıtty.
Dýaldy oqytýǵa baılanysty bıznes ókilderiniń de aıtar óz ýáji bar. Máselen, DDEK kompanııasynyń basshysy Murat Jumataev jastar tokar mamandyǵyn ıgerýge qulshynys tanytpaıdy, jol alys bolǵandyqtan stýdentter zaýytqa kelip-ketýden qınalady, olardyń óndiristik oqý praktıkasyn oqý oryndarynyń basshylyǵy durys qadaǵalasa deıdi. Al «Janna Eltanova» JShS dırektory Janna Eltanova «Jastar praktıkasy», «Alǵashqy jumys orny» jobalaryna qatysatyn jumyssyz jastardy jeńil ónerkásip, onyń ishinde toqyma ónerkásibindegi fabrıkalarǵa shaqyrdy.
Jergilikti atqarýshy bılik stýdentterdiń qatynaý máselesin sheshý úshin jolaýshy tasymaldaýshy kompanııalarmen kelissóz júrgizýge ázir. Qala ákimdigi shákirtterdi sapaly maman etip daıarlap shyǵarý úshin kásiporyndarǵa óz qarjysy esebinen tájirıbelik oqý kýrsynan ótkizýge usynys jasady.
Qysqasy, Prezıdent tapsyrmasyna saı «Jumysshy mamandyqtar jyly» aıasynda qala ákimdigi, óńirlik kásipkerler palatasy jáne bıznes ókilderi birlesip, tııanaqty jumys atqarýǵa ýaǵdalasyp otyr.