Búgin Astanada Memlekettik keńesshi Erlan Qarınniń qatysýymen qazaq halqynyń ulttyq án-kúıi men folklorlyq murasy toptastyrylǵan «Asyl mura» aýdıojınaǵynyń tusaýkeseri ótti, dep jazady Egemen.kz.
«Qazaqstan» respýblıkalyq teleradıokorporasııasy jaryqqa shyǵarǵan «Asyl mura» jınaǵy – Qazaqstannyń mýzyka óneri tarıhynda halyqaralyq strımıngterde keńinen taralǵan eń iri jınaq. Joba «Ozen» mýzykalyq leıblymen birge júzege asyryldy.
Jınaqqa «Altyn qorda» saqtalǵan 400 kúı, 300 jyr-terme, 400 halyq áni men halyq kompozıtorlarynyń ánderi, 100 ertegi, 50 besik jyry, 250 retro hıt án engizildi. Aýdıojınaqtyń ereksheligi – mundaǵy shyǵarmanyń kóbi aýtentıkalyq formada, ıaǵnı, alǵashqy oryndaýshylary jetkizgen túpnusqa kúıinde berilgen.
Jobaǵa engen tańdamaly 1500 aýdıojazba Apple Music, Spotify, Yandex Music, YouTube Musicsııaqty álemge tanymal 100-den astam mýzykalyq platformaǵa júkteldi. Sondaı-aq, týyndylar «Qazaqstan» teleradıokorporasııasynyń altynqor.com saıtyna engizildi.
Saltanatty jıynda sóz sóılegen Memlekettik keńesshi «Asyl mura» aýdıojınaǵynyń jaryqqa shyǵýy jáne ulttyq saz óneri murasynyń álemdik platformalarda qoljetimdi bolýy tól mádenıetimizdiń damýyna tyń serpin beretinin atap ótti.
Erlan Qarın «Memlekettik teleradıokorporasııanyń qorynda ǵana saqtalǵan 1500 túpnusqa týyndy álemdik mýzykalyq platformalarda jarııalanyp otyr. Bul joba Memleket basshysy Qasym-Jomart Toqaev Ulttyq Quryltaıdyń IV otyrysynda kótergen Ulttyq sıfrlyq muraǵat qurý jónindegi bastamany júzege asyrýǵa septigin tıgizedi. Mundaı jobalar ulttyq mádenı kontentti júıeleýge jol ashyp qana qoımaı, ónerpazdardyń jańa býynyna, óskeleń urpaqqa senimdi ári baı derek kózi bolady. Sondaı-aq jasandy ıntellektiniń jadyn edáýir tolyqtyrady», dedi.
Jınaq elimizdegi ulttyq kitaphanalarǵa, О́ner ýnıversıtetteriniń kitaphanalaryna beriledi, sondaı-aq erkin saýdaǵa shyǵarylady.