El Prezıdenti Býrabaıda ótken Ulttyq Quryltaıda Úkimetke depýtattarmen birge «AMANAT» partııasy usynǵan shekara mańyndaǵy aýdandardy damytýǵa qatysty jańa zań qabyldaý bastamasyn jan-jaqty qarastyrýdy tapsyrǵany málim. Sol oraıda Erlan Saırov depýtattyq saýalynda bul – óte mańyzdy mindet ekenin atap ótti, dep habarlaıdy Egemen.kz.
Depýtattyń aıtýynsha búginde Qazaqstannyń 14 oblysy kórshiles 5 elmen (Reseı, Qytaı, О́zbekstan, Qyrǵyzstan, Túrkimenstan) shektesedi. Shekaralyq aımaqtarda 65 aýdan bar. Onda 3,5 mln adam turady. Al shekaranyń túbinde, ıaǵnı shekaradan 50 shaqyrymdyq aralyqta 1,7 mln. halyq turatyn 1 283 eldi meken ornalasqan.
«Alaıda, kezinde júrgizilgen aýdandardy biriktirý, klımattyń qolaısyzdyǵy, jumyssyzdyq, kólik qatynasynyń nasharlyǵy, áleýmettik jáne ınjenerlik ınfraqurylymnyń tozýy, Keńes Odaǵy kezinde shekaralyq aýdandarda halyq sanyn turaqtandyrý úshin qoldanylǵan jeńildikterdiń joıylýy sekildi kóptegen sebepten búginde 65 shekara mańyndaǵy aýdannyń 40-ynda halyq sany azaıyp ketken. Ásirese, bul aýa-raıy qatań Soltústik Qazaqstan, Qostanaı, Pavlodar, Shyǵys Qazaqstan oblystarynda anyq baıqalyp otyr», dedi E.Saırov.
Osyǵan baılanysty Memleket basshysynyń tikeleı bastamasymen Shyǵys Qazaqstan, Abaı oblystarynda Qaton-Qaraǵaı, Marqakól, Tarbaǵataı, Maqanshy aýdandarynyń ashylýy óte oryndy is bolǵanyn, bul sol aýdandardyń áleýmettik-ekonomıkalyq damýyna oń áser etetinin aıtqan Májilis depýtatynyń sózinshe, Prezıdenttiń tapsyrmasyna sáıkes óńirlerdi damytýǵa baǵyttalǵan birqatar memlekettik strategııalyq qujattarda shekaralyq aýmaqtarǵa qoldaý kórsetý sharalary qamtylǵan.
«Degenmen, osy qujattarda qarastyrylǵan shekaralyq eldi mekenderge berilýi tıis jeńildikter áli de is júzine aspady. Bul shekaralyq aýdandarǵa qatysty kózdelgen memlekettik qoldaý tetikteriniń túrli normatıvtik aktilerde shashyrap ketýine, olardy úılestiretin jaýapty ýákiletti organnyń bekitilmeýine, memlekettik sýbsıdııalardy bólý boıynsha jáne ulttyq jobalardy iske asyrý turǵysynda belgili bir sanattarǵa naqty basymdyqtardyń belgilenbeýine baılanysty bolyp otyr», dedi Erlan Saırov.
Depýtattyń aıtýynsha, sonyń saldarynan shekaralyq aýdandardaǵy birqatar eldi mekenderden turǵyndardyń jappaı kóshýi tolastamaı tur. Bul óz kezeginde shekara mańyndaǵy aýmaqtardyń bos qalyp, ulttyq, aýmaqtyq qaýipsizdiktiń álsireýine alyp kelip jatyr.
«Bos jatqan jer jaý shaqyrady» degen. Sondyqtan bul mańyzdy máselege jiti nazar aýdaryp, ony tıimdi sheshý joldaryn shuǵyl qarastyrǵanymyz jón.
Máselen, aýmaǵy úlken jáne halqy az elderdiń (Kanada, Norvegııa jáne Avstralııa) tájirıbesi shalǵaıdaǵy jáne shekara mańyndaǵy aýmaqtardy damytý úshin jergilikti turǵyndarǵa túrli jeńildikter berý tıimdi (salyqtyq, áleýmettik, nesıelik, energetıkalyq jáne t.b.) ekenin kórsetedi», dedi depýtat.
Májilismen Erlan Saırovtyń aıtýynsha atalǵan arnaıy zań qabyldansa, el aýmaǵyn tıimdi paıdalanýǵa, shekaralyq aýdandardy memlekettik qoldaý sharalaryn bir júıege túsirýge, halyqtyń shekaralyq aýmaqtarda turaqtanýyna, óńirdiń damýyna jáne aýmaqtyq qaýipsizdigimizdi qamtamasyz etýge zor serpin beredi. Osy rette, «AMANAT» partııasy jýyrda Memleket basshysynyń tapsyrmasyna sáıkes atalǵan zań jobasyn daıyndap, usynady.