SDU ýnıversıteti – elimizdegi jetekshi oqý oryndarynyń biri. Oqý ornynda 9000-ǵa jýyq stýdent bilim alady. Ozyq oıly, ónertapqyshtar da atalǵan ýnıversıtetten túlep ushyp, el mereıin asqaqtatyp júr. Jyl saıyn talapkerler sany ósip, oqý baǵdarlamasy jańasha, zaman talabyna saı artyp keledi.
Ýnıversıtette aldaǵy ýaqytta jasandy ıntellektiniń qyr-syryn úıretý qolǵa alynyp otyr. Oǵan aıqyn dálel retinde jaqynda jańa oqý blogi ashyldy. Onyń irgetasy osydan bir jyl buryn Almaty oblysynyń ákimi Marat Sultanǵazıevtiń qatysýymen qalanǵan edi. Atalǵan jobaǵa «Freedom Holding Corp.» kompanııasy qarjylaı qoldaý bildirip, yntymaqtastyqty arttyrý maqsatynda jańa oqý korpýsy «SDU & Freedom» jasandy ıntellekt blok retinde qoldanysqa berildi.
Oqý ordasyndaǵy erekshe ǵımarattyń ashylýyna Ǵylym jáne joǵary bilim mınıstri Saıasat Nurbek, «Freedom Holding Corp.» kompanııasynyń bas atqarýshy dırektory Tımýr Týrlov, Almaty oblysy ákiminiń birinshi orynbasary Nurlan Ábdirahym, «Qazaqtelekom» kompanııasynyń basqarma tóraǵasy Baǵdat Mýsın, «Sergek» kamerasyn oılap tapqandardyń biri Áset Ahmetov sııaqty ýnıversıtettiń tanymal túlekteri qatysty.
Ǵylym jáne joǵary bilim mınıstri Saıasat Nurbek «Bilimge salynǵan ınvestısııa úlken tabys ákeledi» degen amerıkalyq fılosof B.Franklınniń sózin tilge tıek etip, jasandy ıntellekt jobasyna qarjylaı qoldaý bildirgen Tımýr Rýslanulyna alǵysyn jetkizdi. Sondaı-aq bul bastamanyń bolashaǵy zor ekenin aıtty.
«Jasandy ıntellekt bloginiń qurylýy – elimizdiń zııatkerlik áleýetin qalyptastyrýdaǵy mańyzdy qadam. Bir jaǵynan, bul SDU ýnıversıteti úshin úlken jetistik. Endi joba aıasynda stýdentter men zertteýshilerge bolashaq tehnologııasyn tereń zerttep, qoldanýǵa jańa múmkindik ashylady.
Memleket ǵylym men bilimdi damytatyn barlyq bastamany qoldaıdy. Biz SDU ýnıversıteti sıfrlyq tehnologııalar salasynda elimizdegi mańdaıaldy mamandar daıarlaıtyn basty oqý ornynyń birine aınalady dep senemiz. Munda jańashyl ıdeıalar men ınnovasııalyq jobalar týyndaıtynyna kúmánim joq. Búginde jasandy ıntellekt úlken korporasııalar men ulttyq strategııalardyń deńgeıinde qoldanylady. Biraq bıznes salasy onyń qýatyn áli sezgen joq. Sondyqtan bul jaqsy bastama. Jalpy SDU ýnıversıteti pedagogıka, aqparattyq tehnologııa, kıberqaýipsizdik baǵytynda alda kele jatqan oqý ornynyń biri bolǵandyqtan, «Freedom Holding Corp.» kompanııasynyń ınvestısııasy óz jemisin beretini anyq. О́ıtkeni aldaǵy ýaqytta atalǵan korporasııa óz áleýetin, sıfrlyq tehnologııa jaǵynan damýyna múmkindik alyp otyr», dedi S. Nurbek.
SDU ýnıversıteti rektory Álimjan Igenbaevtyń sózine súıensek, SDU ýnıversıteti IT, ınjenerııa, pedagogıka, quqyq, áleýmettik ǵylymdar jáne bıznes salalarynda suranysqa ıe mamandardy 30 jylǵa jýyq ýaqyt daıarlap keledi. Sondyqtan halyqaralyq seriktestermen, akademııalyq ınstıtýttarmen, bıznes qaýymdastyǵymen yntymaqtastyq aıasynda damý keleshegi aıqyn baıqalady.
«Jańa blok stýdentterdiń áleýetin arttyryp, olardyń startaptaryn júzege asyrýǵa múmkindik beretinine senimimiz mol. Bul jańa nysan – óńirimizdegi bilim men ǵylym salasyn damytýdaǵy úlken qadam dep bilemiz», dedi ýnıversıtet rektory.
Aıta keteıik, SDU jańa oqý blogi «Freedom Holding Corp» kompanııasynyń «Freedom Shapaǵat» qaıyrymdylyq qorynyń demeýshiligimen salyndy. Jalpy aýmaǵy – 5,6 myń sharshy metr. Munda jasandy ıntellekt tehnologııalaryn damytýǵa, qarjylyq saýattylyqty arttyrýǵa arnalǵan zerthanalar ornalasqan. Sondaı-aq ınteraktıvti ortalyqtar qurylyp, stýdentter qaýymy «Freedom Academy» sarapshylarynan ınvestısııalaý jáne treıdıngtiń negizgi qaǵıdalaryn úırenedi.
Dıdar MÁLIKULY
Almaty oblysy