Kólik vıse-mınıstri Maqsat Qalıaqparov Aqmola oblysyna jumys saparymen baryp, Kókshetaý – Zerendi tasjolynda júrip jatqan ortasha jóndeý jumystarymen tanysty. Bul jolda elimizde alǵash ret reversıvti qozǵalys jolaǵy engizilmek, dep habarlaıdy Egemen.kz vedomstvonyń baspasóz qyzmetine silteme jasap.
Mınıstrliktiń habarlaýynsha, jobanyń ereksheligi – joldyń eni 7 metrden 11 metrge deıin keńeıtilip, úsh jolaqty júıe qalyptasady. Ortańǵy jolaq reversıvti bolmaq, ıaǵnı qozǵalys baǵytyna baılanysty aýysyp otyrady. Bul joldyń ótkizý qabiletin arttyryp, jazǵy týrıstik maýsymda kólik tyǵynyn azaıtýǵa jáne jol-kólik oqıǵalaryn aldyn alýǵa múmkindik beredi.
«Jazǵy ýaqytta Zerendi kýrorttyq aımaǵyna baratyn kólik sany artatyny sózsiz. Jóndeý jumystary 47 shaqyrymdy qamtıdy. Qazir joba aıasyndaǵy jumystar belgilengen kestege saı júrip jatyr», dedi vıse-mınıstr.
Aıta keteıik, Zerendi – elimizdegi eń tanymal demalys oryndarynyń biri. Ár jyly bul óńirge myńdaǵan týrıst keledi. Osyǵan oraı, jol ınfraqurylymyn jańartý nazarǵa alynǵan.
Jalpy, 2025 jyly respýblıka boıynsha 7 myń shaqyrym jol ortasha jóndeýden ótpek. Bul jumystar, eń aldymen, týrıstik áleýeti joǵary aımaqtarǵa baǵyttalǵan. Olardyń qatarynda Alakól, Baıanaýyl, Qorǵaljyn, Kólsaı men Qaıyńdy, Rahmanov qaınary, Kendirli, sondaı-aq Imantaý-Shalqar kýrorttyq aımaǵyna aparatyn joldar bar.