Joǵarǵy Sot Tóraǵasy Aslambek Merǵalıev Qazaqstan Respýblıkasy Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıevpen jumys babynda kezdesý ótkizdi, dep habarlaıdy Egemen.kz.
Sot júıesin sıfrlandyrýdy damytýdyń negizgi aspektilerin talqylaýǵa Sot ákimshiliginiń basshysy Naıl Ahmetzakırov pen Astana Hub bas dırektory Maǵjan Mádıevte qatysty.
Kezdesýde Joǵarǵy Sot Tóraǵasy elimizde qoljetkizilgen aıtarlyqtaı jetistikterdi atap ótti: elektrondy sot isin júrgizý júıesi jumys isteıdi, sıfrlyq kómekshiler, jasandy ıntellekt (JI) algorıtmderi, kúndelikti prosesterdi avtomattandyrý engizilgen, bul sýdıalardyń jumysyn edáýir jeńildetedi.
Mınıstr men Astana Hub bas dırektorynyń nazary sóıleýdi taný fýnksııalaryn, JI algorıtmderin jáne mamandandyrylǵan onlaın platformasyn qamtıtyn ınternet-sottyń ázirlengen jáne sátti synaqtan ótken prototıpine tústi. Mınıstrdiń aıtýynsha, bul model elektrondy sot zaldarynyń jańa býynyn qurý jáne sot tóreligin odan ári sıfrlandyrý jolyndaǵy mańyzdy qadam bolyp tabylady.
Talqylaýda tek ınfraqurylymdy jańartýǵa ǵana emes, sonymen qatar sot tóreligin júzege asyrý tásilderin qaıta qaraýǵa – ashyqtyqqa, isterdi qaraý jyldamdyǵyna jáne zamanaýı JI sheshimderdiń arqasynda sot prosesteriniń sapasyn arttyrýǵa basa nazar aýdaryldy.
Mınıstr jobany damytýdyń qazirgi kezeńinde qoldaýǵa daıyn ekenin aıtyp, Prezıdenttiń tapsyrmasy boıynsha ozyq JI sheshimderin engizýdiń halyqaralyq alańy retinde qurylǵan Alem.AI ortalyǵy pılottyq jobany júzege asyrýdyń bastapqy núktesi bola alatynyn jáne otandyq JI ázirlemeleriniń áleýetin jahandyq álemge tanyta alatynyn atap ótti. Tolyq jumys isteıtin jańa býyn sot zalyn ornalastyrý úshin balama oryndy qarastyrýdyń oryndylyǵy da atap ótildi.
A.Merǵalıev, ásirese, sot prosesteriniń tıimdiligi men jedeldiligine qoǵam tarapynan qoıylatyn jańa mindetter men talaptardy eskere otyryp, bul baǵytty jalǵastyrýdyń mańyzdylyǵyn atap ótti.
M.Mádıev sot júıesiniń sıfrlyq transformasııasyn neǵurlym qoljetimdi, ashyq jáne ádil sot tóreligine jasalǵan qadam dep atady.
Taraptar aldaǵy kúzde jańa platformanyń kórsetilimin jáne sot júıesiniń negizgi JI ónimderiniń tanystyrylymyn ótkizýge kelisti.
Jasandy ıntellekt pen aqparattyq tehnologııalardyń damýy ómirdiń negizgi salalaryn, sonyń ishinde sot tóreligin ózgertýge qýatty serpin beredi. Sot praktıkasynda JI-ti qoldaný jańa shyndyqqa aınalyp jatyr, onda avtomattandyrý, sıfrlyq kómekshiler men onlaın platformalar zamanaýı, tıimdi sot tóreliginiń ajyramas quraldaryna aınalyp jatyr.