Senat spıkeri Máýlen Áshimbaevtyń tóraǵalyǵymen Jumysshy mamandyqtary jylyn ótkizýge arnalǵan Is-sharalar jospary aıasynda Memleket basshysy júktegen mindetterdi iske asyrý máseleleri jóninde jıyn ótti.
Jıynda depýtattar múddeli taraptarmen birge jumysshy mamandyqtardy qoldaý jáne olardyń bedelin arttyrý sharalaryn talqylady. Sondaı-aq olar atalǵan baǵyttaǵy zańnamany jetildirýge qatysty usynystaryn aıtty.
Máýlen Áshimbaev atap ótkendeı, Memleket basshysynyń tapsyrmasymen Úkimet Jumysshy mamandyqtary jylyn ótkizýge arnalǵan Is-sharalar josparyn qabyldap, jaýapty memlekettik organdar men uıymdardy bekitti. Senat tóraǵasy Prezıdent tapsyrmalaryn sapaly iske asyrý úshin barlyq múddeli taraptyń belsendilik tanytýy mańyzdy ekenin aıtyp, bul rette tehnıkalyq jáne kásiptik bilim berý júıesin keshendi túrde jańǵyrtý qajettigine nazar aýdardy.
«Senat Prezıdent Qasym-Jomart Toqaev belgilep bergen mindetterdi oryndaý úshin zańnamany jetildirýge arnalǵan bastamalardy belsendi túrde ilgeriletýdi kózdep otyr. Osy iste sarapshylardy, ǵalymdardy jáne sala mamandaryn jumyldyrýdyń bereri mol. Jalpy, bul baǵytta, eń aldymen, tehnıkalyq jáne kásiptik bilim berý júıesin sapaly qaıta jańǵyrtý qajet. Sondaı-aq atalǵan bilim berý júıesin jahandyq trendterge beıimdeý jáne ishki eńbek mıgrasııasyn ońtaıly damytý da asa mańyzdy. Jumysshy mamandyq ıelerin áleýmettik qoldaýdyń jáne olardyń bedelin arttyrý jumystaryn júrgizý de erekshe mánge ıe. Qazir Senat osy baǵyttaǵy zańnamalyq bastamalarmen jumys istep jatyr», dedi M.Áshimbaev.
Sonymen qatar palata spıkeri bul kezdesý Senattyń ortalyqta jáne óńirlerde atqaryp kele jatqan jumysynyń jalǵasy ekenin tilge tıek etti. Naqty aıtqanda, depýtattar buǵan deıin Petropavlda óńirlerde eńbek resýrstaryn damytý máselelerine arnalǵan dóńgelek ústel ótkizgen edi. Buǵan qosa eńbek adamyn qoldaý máselesi Parlamenttik tyńdaýda jáne Senatorlar keńesiniń otyrysynda talqylandy. Atalǵan is-sharalarda bul baǵyttaǵy ózekti máselelerdi sheshýge arnalǵan zamanaýı tásilder sóz boldy.
Búgingi kezdesýge qatysýshylar bilikti kadrlar tapshy qazirgideı kezeńde bilim berý júıesiniń barlyq býynyn damytý óte ózekti máselege aınalyp otyrǵanyn basa aıtty. Senat tóraǵasy atap ótkendeı, bul rette bilim berý júıesiniń eńbek naryǵymen jáne óndirispen ózara is-qımyl sapasyn arttyrý, ony sheshý barlyq múddeli taraptyń júıeli ári keshendi birlesken jumysyn qajet etedi.
Is-sharaǵa Oqý-aǵartý mınıstri Ǵanı Beısembaev, Eńbek jáne halyqty áleýmettik qorǵaý mınıstri Svetlana Jaqypova, basqa da memlekettik organdardyń, «Atameken» ulttyq kásipkerler palatasynyń, «Mashına jasaýshylar odaǵynyń» jáne «Otbasy banktiń» basshylyǵy, sondaı-aq sarapshylar men qoǵam qaıratkerleri qatysty.