Parlament Senatynyń depýtattary Qazaqstan halqy Assambleıasy keńesiniń qurylǵanyna 30 jyl tolýyn merekeleýge oraı ótken otyrysqa qatysty. Is-sharaǵa qatysýshylar QHA-nyń qoǵamdyq kelisim men etnosaralyq dıalogti nyǵaıtýǵa qosqan úlesin, sondaı-aq Assambleıany jańa jaǵdaıda odan ári damytýdyń basym baǵyttaryn talqylady.
Senator Nurtóre Júsip otyrys barysynda árbir etnos ókiliniń elimizdiń damýyna qosqan úlesi men daýsy estilýinde Qazaqstan halqy Assambleıasy róliniń mańyzdy ekenin atap ótti. Ol qoǵamdyq ómir, jastar tárbıesi jáne ult bolashaǵyn qalyptastyrýda Assambleıanyń zor áser etetin jandy, serpindi tetik ekenin naqtylady.
«Qazaqstan halqy Assambleıasy – erekshe ınstıtýt. Bul jaı ǵana qoǵamdyq uıym emes, ol Parlamentke depýtattardy usyný salasyndaǵy saıası salmaǵy men ókilettigi bar konstıtýsııalyq organ. Assambleıa qyzmet etken 30 jylda azamattyq beıbitshilikti, etnosaralyq kelisim men toleranttylyqty nyǵaıtýdyń naqty beınesine aınaldy. Onyń jumysynyń arqasynda alýan túrli mádenıetterdi memleketimizdiń negizgi basymdyǵyna aınaldyrýǵa múmkindik týdy», dedi N.Júsip.
Senator Assambleıa jumys istegen jyldarda qoǵamdyq dıplomatııa ortalyǵyna aınalǵanyn jáne jahandaný men kóshi-qon úderisinen bastap, tilderdi saqtaý men kemsitýshilikke qarsy is-qımylǵa deıingi qazirgi zamannyń ózekti syn-qaterlerin talqylaýda mańyzdy tuǵyrnamaǵa aınalǵanyn atap ótti.
«Qazaqstan halqy Assambleıasy – bul kópultty elde dıalogke, ózara syılastyq pen yntymaqtastyqqa basymdyq beriletin qazaqstandyq konsensýs úlgisi. Bul barlyq etnos ókiliniń sheshim qabyldaý jáne azamattyq tutastyqty qalyptastyrý úderisine qatysýyn qamtamasyz etetin pármendi tetik. Bul jerde tek toleranttylyq týraly emes, árkimniń el bolashaǵyna shynaıy qatysýy men atsalysýy týraly aıtylyp otyr. Assambleıa búgingi tańda jetilgen, tıimdi jáne suranysqa ıe ınstıtýt ekeni aıqyn. Onyń tarıhy qazirgi Qazaqstan tarıhynyń, dıalog, senim jáne jaýapkershilik tarıhynyń bir bóligi», dedi depýtat.