Qazirgi ýaqytta Almatyda qala quramyna jańadan engen Almaty oblysynyń aýdandaryn jaryqtandyrý jumystary qarqyndy júrip jatyr. Josparǵa sáıkes, jumystar 2025 jyldyń sońyna deıin tolyq aıaqtalýy tıis. Bul týraly «Almaty Qala Jaryq» memlekettik kommýnaldyq kásipornynyń basshysy Igor Mysık aıtty, dep habarlaıdy Egemen.kz.
«Biz turǵyndar men aýdan ákimdikterinen jaryqsyz otyrǵan ýchaskeler týraly aqparatty úzdiksiz jınaımyz. Mysaly, Alataý aýdanynda birde-bir kóshesinde shamy joq Túrkistan shaǵyn aýdany bar. Bizdiń mamandar aınalma joldar júrgizdi, syzbalar saldy, qajetti materıaldyń mólsherin eseptedi. Nátıjesinde osy shaǵyn aýdannyń 7 kóshesinde tirekter men kronshteındermen birge 90 sham ornatyldy», dedi Igor Mysık.
Sonymen qatar, Almatydaǵy iri saıabaqtarda da jaryqtandyrý júıesin jańartý jumystary qolǵa alynǵan. Máselen, 28 gvardııashy-panfılovshylar saıabaǵynda Armııa úıi mańyna 11 bıik sham tiregi, 22 trotýarǵa arnalǵan sham jáne 30 projektor ornatylyp, ǵımarattyń kelbeti aıshyqtala tústi.
Budan bólek, «Shuǵyla» jáne «Jeltoqsan» saıabaqtarynda, sondaı-aq Seıfýllın men Sholohov kósheleriniń qıylysynda jerasty kabelderi jańartylyp jatyr. Kishi Almaty ózeniniń boıymen (Maqataevtan Qurmanǵazy kóshesine deıingi aralyqta) bes shaqyrymdyq kabeldik jelini almastyrý jumystary bastaldy. «Almaty Qala Jaryq» bul jumystardy jaz mezgiline deıin aıaqtaýdy josparlap otyr.