Oblysta 41 myńnan astam bala úshin 31 jazǵy saýyqtyrý lagerleri jasaqtalǵan. Jazǵy demalys tek tynyǵý emes, sonymen qatar tulǵalyq, shyǵarmashylyq jáne rýhanı damýǵa baǵyttalǵan mańyzdy kezeń bolmaq, dep habarlaıdy Egemen.kz.
Bıyl óńirde alǵash ret modýldi lager qolǵa alyndy. Oblystyń 5 aýdanyndaǵy jazǵy saýyqtyrý lagerlerinde 54 modýldik jatyn bólme, 2 ashana, 4 ájethana ornatylady. Osylaısha óńirdegi balalar demalysyn uıymdastyrý isindegi basty túıtkil – oryn tapshylyǵy men sanıtarlyq talaptardyń saqtalmaýy máseleleri sheshimin tappaq.
Modýldik konstrýksııalar – zaman talabyna saı, ásirese, jazda balalardy jyldam ári sapaly túrde jaıǵastyrý úshin óte qolaıly. «Tólebı nury», «Taý shyńy», «Balaýsa», «Taý barysy» jáne «Baldáýren» lagerlerine ornatylatyn modýlder bir aýysymda myńnan astam balany qabyldaýǵa múmkindik beredi. Jalpy jazǵy maýsymda bul lagerlerde 10 myńǵa jýyq bala demalady dep josparlanyp otyr. Qazirgi tańda jatyn oryndarmen qatar, sanıtarlyq toraptar men ashanalar da daıyndalyp jatyr.
Sondaı-aq, jazǵy saýyqtyrý keshenderinde aǵymdaǵy jóndeý jumystary qarqyndy júrgizilýde. Mysaly, óńirdegi «Samal» jazǵy saýyqtyrý lageri 20 jyldan beri alǵash ret kúrdeli jóndeýden ótti. Terezeler men esikter jańartylyp, ishki ájethanalar ornatylyp, ǵımaratqa syrlaý jáne ákteý jumystary uıymdastyryldy.