Almaty oblysynda Uly Otan soǵysyndaǵy Jeńistiń 80 jyldyǵy keń kólemde atalyp ótti.
Osy óńirde turatyn soǵys ardagerlerine QR Prezıdenti Qasym-Jomart Toqaevtyń atynan quttyqtaýlar kelip tústi. Jeńisti jaqyndatqan ardagerlerge ataýly kúnge oraı ystyq lebizge toly hattar, estelik syılyqtar jáne Jeńistiń 80 jyldyǵyna arnalǵan merekelik medaldar berildi. Bul kúngi basty qýanyshty jańalyqtyń biri – beıbit ómir syılaǵan soǵys ardagerlerine memleket tarapynan kórsetilgen qamqorlyq pen qurmet retinde Qonaev qalasynda salynǵan turǵyn úılerden demeýshilerdiń atynan baspana kiltiniń tabys etilýi boldy. Sonymen birge, oblys ákimi Marat Sultanǵazıevtiń tapsyrmasymen aımaqta turatyn kózi tiri 5 soǵys ardagerine 5 mıllıon teńgeden áleýmettik kómek berildi. Jeńis kúnindegi saltanatty shara oblys ortalyǵyndaǵy "Dańq" memorıalyna gúl shoqtaryn qoıýdan bastaldy. Sharaǵa oblys basshylyǵy men ár deńgeıdegi máslıhat depýtattary, ardagerler uıymy men túrli mekeme ókilderi qatysty.
Saltanatty rásimge soǵys ardagerleri arnaıy kólikpen jetkizildi. Oblystyq tótenshe jaǵdaılar departamentiniń orkestri sharany mýzykamen árlep, mereke kórkin qyzdyrdy. Sharaǵa qatysqandardyń arasynda ekinshi dúnıejúzilik soǵys ardagerleri Soltanbaı Jaryqbasov pen Alym Kıbırov ta boldy.
Saltanatty sharada sóz alǵan Soltanbaı ata "Jeńis - bizdiń barshamyzǵa ortaq taǵylymdy tarıhymyz, bizdiń ómirimizdiń ózegi ári dańqymyz, abyroı-bedelimizdiń kórinisi" - dese, al Alym Kıbırov ata Jeńistiń qadir-qasıetin keıingi jas urpaq jadyna saqtap, sezinip ósse degen tilegin jetkizdi.
- Jeńistiń 80 jyldyq merekesi tek ardagerlerge qurmet kórsetýmen shektelmeıdi. Bul kúnniń bolashaq urpaq úshin de mańyzy zor, - dedi oblys ákimi Marat Eleýsizuly.
Mereke kúni aımaq basshysy ardager Oksana Betebaevaǵa QR Prezıdentiniń atynan Quttyqtaý hat, estelikke syılyq usynyp, jańa páterdiń kiltin tabystady.
Merekelik is-sharalar oblys aýmaǵynda aıryqsha ataldy. Oblys murajaılarynda, kitaphanalarda jáne Mádenıet úılerinde kórmeler, eske alý keshteri men ádebı-tanymdyq kezdesýler uıymdastyryldy.
Máselen, oblystyq kitaphanada qaısarlyq pen batyrlyq taqyrybynda ıgi shara ótse, al Qarasaı aýdanyndaǵy "Atameken" ortalyǵynda jınalǵan qaýym Halyq qaharmany, general-polkovnık Saparǵalı Toqpaqbaevtyń taǵylymdy áńgimesin tyńdady.
Jeńis kúnin merekeleý 9 mamyrmen shektelmesi anyq. Oblys jastarynyń bastamasymen "80 jylǵa – 80 ıgi is" aksııasy qolǵa alyndy. Bul aksııa aıasynda 200-den astam ardagerge kómek kórsetiledi. Eriktiler tyl eńbekkerleri men jalǵyz basty qarııalardyń shańyraqtaryna bas suǵyp, úı jınaýǵa jáne aýlasyn abattandyrýǵa qol ushyn sozýda. Mektep oqýshylary men stýdentter úshin de áskerı bólimder men shekara zastavalary otanshyldyq rýhty kóteretin ekskýrsııalar ótkizedi.
Sondaı-aq, Talǵar aýdanyndaǵy Nura aýylynda báıge ótip, jarysta 100-ge jýyq shabandoz óner kórsetti. Jeńis kúnindegi ıgi shara Raıymbek aýdany Talas aýylyndaǵy soǵys ardagerlerine arnalǵan eskertkishtiń ashylýymen túıindeldi.
Almaty oblysy.