Elimizde kólik ınfraqurylymyn damytýdyń negizgi baǵyttaryn tolyq qamtıtyn aýqymdy jol qurylysy maýsymy bastaldy. Jalpy uzyndyǵy 8,8 myń shaqyrym bolatyn ártúrli deńgeıdegi avtomobıl joldarynda jumys júrgizý josparlanyp otyr. Osyǵan oraı «QazAvtoJol» UK» AQ Qostanaıda shyǵatyn «Lovol» traktorlarynyń jańa legin satyp alyp, tehnıkalyq qýatyn kúsheıtti.
Bıyl jol jóndeý, jol salý jumystaryna el kóleminde 10 myńǵa jýyq jol-qurylys tehnıkasy, 27 asfaltbeton zaýyty jáne 25 myń maman tartylady.
«Buǵan deıin jarııalanǵan baıqaýǵa otandyq tehnıka shyǵaratyn kásiporyndardyń bári qatysty. «Agromash» zaýytynyń lokalızasııa ortalyǵy – jańa tehnologııa qurylǵylarmen jabdyqtalǵan jáne lokalızasııa úlesi joǵary zaýyttardyń biri. Sondyqtan shartta kórsetilgen tehnıkanyń qosymsha tirkemesi, aspaly qondyrǵylary bolý kerek degen tárizdi tehnıkalyq talaptar údesinen shyqtyq. Tehnıkany qysqa merzim ishinde «QazAvtoJol» kompanııasynyń korporatıvtik túsine boıap berdik. Biz satyp alýshylardyń talap-tilegin eshqashan jerge qaldyrmaımyz. Kompanııaǵa «Lovol 854» traktorlarynyń lımıttelgen serııasyn tapsyrdyq», deıdi «Agromash» zaýytynyń kommersııalyq dırektory Nıkolaı Parhomenko.
Jańa traktorlar taıaý kúnderi kúre jolǵa shyǵyp, keshendi qyzmet kórsetýge kirisedi.
«Qostanaı traktorlary negizinen jol kútimine paıdalanylady. Mysaly, qysta jol ústin qar-muzdan tazartý, kóktaıǵaqty eritetin materıaldardy tasý, jazda jol ortasyn, jol jıekterin tazartý, jýý sııaqty keń aýqymdy mindetterdi oryndaýǵa arnalǵan», deıdi «QazAvtoJol» UK» AQ baspasóz qyzmeti.
«Agromash» basshylyǵy zaýyt memlekettik jáne jekemenshik kompanııalardyń suranysyn keshiktirmeı óteýge qashanda ázir ekenin aıtady.
Qostanaı oblysy