Astanada kólik sany jyldan-jylǵa artyp kele jatqandyqtan, turaq máselesi de qala turǵyndarynyń ýaıymyna aınaldy. Osy olqylyqtyń ornyn toltyrý úshin elorda kóshelerine aqyly avtoturaq júıesi engizilgen edi. Alaıda, bul turaqtar da júrgizýshiler úshin qolaıly bolmaı shyqty. Qala turǵyndarynyń biri ony tártip ornatýdyń amaly dese, endi biri aqsha tabýdyń quraly dep sanaıdy. Jalpy aqyly avtoturaq qanshalyqty tıimdi? Osy saýal tóńireginde Egemen.kz tilshisi zertteý júrgizip kórdi.
Osy oraıda aqyly avtoturaqtardyń qyzmetin kúndelikti paıdalanyp júrgen júrgizýshilerdiń pikirin surap bildik. Olardyń bir bóligi júıeniń kólik aǵynyn retteýge kómegi tıetinin aıtsa, ekinshi bóligi qyzmet sapasynyń tómendigine shaǵymdandy.
Rızabek esimdi júrgizýshiniń pikirinshe aqyly avtoturaq kólik qoıatyn oryndy izdeýge ketetin ýaqytty únemdeıdi.
« Saýda ortalyqtary men iskerlik aımaqtarda oryn tabý buryn qıyn bolsa, qazir tólem jasap, tez turaqqa qoıa alamyz. Inflıasııa kezinde 100 teńge úlken soma emes. Bul júıe kólik qozǵalysyn retteýge kómektesedi», deıdi ol.
Taǵy bir júrgizýshi óziniń iskerlik aýdandar men saýda ortalyqtaryna jıi baratynyn aıtyp, aqyly avtoturaqtar júıesi qoldanysqa engizilgeli másele sheshimin taba bastaǵanyn atap ótti.
«Bul jerde másele aqshada emes, júıeniń ádilettiliginde. Aqyly avtoturaqtarda beınebaqylaý kamerasy men jetkilikti oryn bolýy tıis. Keı aýdandarda aqsha tólesem de báribir kóligimdi qoıatyn oryn tappadym. Bul durys emes» deıdi Erasyl esimdi turǵyn.
Al endi biri keıbir aqyly turaqtarda qaýipsizdikke asa mán berilmeıtindigin aıtty.
«Bir joly kóligimdi túnde aqyly turaqta qaldyrdym. Tańerteń kóliktiń aınasyn tappaı qaldym. Eshkim jaýap bermeıdi. Sonda ne úshin aqsha tólep júrmiz? Eshqandaı kúzet, beınebaqylaý joq. Aqyly turaq ıeleri aqsha alyp otyrǵandyqtan kóligimizdiń qaýipsizdigin de qamtamasyz etýi kerek», deıdi Manarbek esimdi júrgizýshi.
Baıqaǵanymyzdaı júrgizýshiler men turǵyndar arasynda bul júıege degen kózqaras ártúrli. Biri aqyly turaqtar arqyly qala kóshelerinde tártip ornaǵanyn aıtsa, endi biri júıeniń ádiletsizdigin, qyzmet sapasynyń tómendigin jáne qoljetimdi tegin balamanyń joqtyǵyn alǵa tartady. Tólem jasaý tetikteriniń yńǵaısyzdyǵy, qaýipsizdik máseleleri men ashyq aqparattyń tapshylyǵy da turǵyndar tarapynan synǵa ushyrap otyr.
Qala turǵyndarynyń ekiudaı pikirine oraı saýalymyzǵa jaýap alý maqsatymen Astana ákimdigine habarlasqanymyzda ákimdik ókili qaladaǵy aqyly avtoturaq stansııalary kommýnaldyq menshiktegi basqarýǵa ótkeli jatqanyn málimdedi. Qalanyń kólik basqarmasy 2024 jyldyń jeltoqsan aıynan bastap jeke kompanııamen aradaǵy memlekettik-jekeshelik áriptestik kelisimshartyn qaıta qarastyryp jatqan kórinedi. 2025 jyldyń 6 aqpanynda qosymsha kelisimge qol qoıylǵan. Ákimdik ókili osyndaı prosesterdiń júrip jatqanyna baılanysty tolyq aqparatty ázirge jarııalaı almaıtyndaryn aıtty.