Almaty qalasy Jastar saıasaty basqarmasynyń qoldaýymen «Almaty stýdentter alıansy» QQ uıymdastyrǵan shahardyń shyǵarmashyl jastary arasyndaǵy «Jas Gala» stýdenttik kóktem baıqaýy óz máresine jetti. Jeńistiń 80 jyldyǵyna, Jumysshy jastar jylyna, Qazaqstan halqy Assambleıasynyń 30 jyldyǵyna, N.Tilendıevtiń 100 jyldyǵyna, Sh.Qaldaıaqovtyń 95 jyldyǵyna arnalǵan stýdentter festıvaliniń saltanatty marapattaý keshi «Concordia» teatrynda ótti.
Jyl saıyn dástúrli túrde ótkiziletin óner saıysy Almaty qalasynyń eń daryndy, kreatıvti jáne ónerge qushtar jastaryn bir alańda toǵystyrady. Festıvalǵa shahardyń 27 joǵary oqý ornynan, 25 kolledjden 608 ótinim túsken. Jobaǵa 297 myńnan asa stýdent qatysýǵa nıet bildirgen. Olar vokal, horeografııa, mobılografııa, aspaptyq oryndaý, teatr baǵyttary boıynsha baq synady. Baıqaýdyń júlde qory – 7 500 000 teńge.
Bıyl aspapta oryndaý baǵyty qazaqtyń birtýar kompozıtory, kúıshi-dırıjer Nurǵısa Tilendıevtiń 100 jyldyq mereıtoıyna arnaldy. Bul baǵyt boıynsha 122 qatysýshy ózara baq synasty. Toptyq oryndaýda P.Chaıkovskıı atyndaǵy Almaty mýzykalyq kolledjiniń «Jeldirme» ansambli, jeke oryndaýda da osy mýzykalyq kolledjdiń stýdenti Nurdana Skendir júldeli 1-oryndy ıelendi.
Vokal baǵyty boıynsha 1-orynnyń júldesi Qurmanǵazy atyndaǵy Qazaq ulttyq konservatorııasynyń stýdenti Rysbek Asqarǵa, horeografııa baǵyty boıynsha Qazaq bas sáýlet qurylys akademııasy kolledjiniń «Dapamine» tobyna, teatr baǵyty boıynsha Abaı atyndaǵy Qazaq ulttyq pedagogıkalyq ýnıversıtetiniń «Qaganat» teatryna, mobılografııa baǵyty boıynsha Qazaq ulttyq qyzdar pedagogıkalyq ýnıversıtetiniń stýdenti Móldir О́tepovaǵa tabystaldy.
Jastar saıasaty basqarmasynyń basshysy Azız Qajdenbek jyldan-jylǵa deńgeıi jetilip kele jatqan «Jas Gala» shyǵarmashylyq baıqaýynyń jastarǵa serpin berer mańyzy týraly aıta kelip, barsha qatysýshylar men kesh qonaqtaryna óz alǵysyn bildirdi.
«Jas Gala» baıqaýy jastar arasynda jyldan-jylǵa úlken suranysqa ıe bolyp keledi. Bul tek shyǵarmashylyq doda ǵana emes, bolashaqta jastar shyǵarmashylyǵyna jol ashatyn úlken múmkindik dep sanaımyz. Bıylǵy baıqaýdyń ereksheligi, jeńimpazdar júldeli syılyqtardan bólek, Almaty qalasynyń ákimi Erbolat Dosaevtyń qoldaýymen qalanyń aýqymdy ári mańyzdy is-sharalarynda óner kórsetetin bolady.
Qaladaǵy jańa talanttardy tanyp, úzdik jastardy anyqtaýǵa múmkindik beretin bul joba bir aıdan astam ýaqytqa sozyldy. Festıvaldyń jabylý saltanatyna belgili, óner jáne mádenıet qaıratkerleri, tanymal juldyzdar, sondaı-aq qoǵamdyq jáne shyǵarmashylyq ortanyń belsendi ókilderi qatysty.
ALMATY