Qazirgi kezde ınternette balalar men jasóspirimderge baǵyttalǵan qaýipti oıyndardyń túr-túri bar. «Tıhıı dom», «Razbýdı menıa v 4:20», «More kıtov», «Sınıı kıt», «Krasnyı delfın», «Mlechnyı pýt», «U19», «F57», «SchoolBoy RunaWay – Stealth» sııaqty oıyndar áli kúnge deıin balalardyń sanasyn ýlap, olardyń ómirine qaýip tóndirip jatyr, dep jazady Egemen.kz.
Mundaı oıyndardyń basty maqsaty – jasóspirimderdi shynaıy ómirden alystatyp, olardyń psıhologııalyq álsizdigin paıdalaný. Olar balany túrli qaýipti tapsyrmalar oryndaýǵa májbúrleıdi, bul tapsyrmalar alǵashqyda jeńil ári qyzyqty bolyp kóringenimen, ýaqyt óte kele olar balanyń psıhologııalyq jaǵdaıyn kúrdelendirip, tipti sýısıdke deıin jetkizýi múmkin. Psıholog Nazgúl Seıdahmetovanyń pikirinshe, mundaı oıyndardyń basty qaýpi – olardyń balalardyń sanasyna tereń áser etýinde.
«Bul oıyndar balalardyń ózin mańyzdy sezingisi kelýi sezimin paıdalanady. Kóptegen bala ata-anasymen qarym-qatynasynyń sýyp ketkeninen nemese qurdastarynan qoldaý tappaǵanynan osyndaı vırtýaldy qaýymdastyqtarǵa qosylady», deıdi ol.
Internet qaýipsizdigi jónindegi sarapshy Tımýr Ábdiqulov bul máseleni sheshý úshin sıfrlyq saýattylyqty arttyrý kerektigin aıtady.
«Mundaı qaýipti kontent kóbinese áleýmettik jeliler men jabyq toptar arqyly taratylady. Sondyqtan ata-analar balalarynyń ınternettegi áreketterin qadaǵalaǵany jón. Jalpy balalardyń ınternettegi qaýipsizdigin qamtamasyz etý – barshamyzdyń ortaq mindetimiz. Olarǵa súıenish bola otyryp, shynaıy ómirdiń vırtýaldy álemnen áldeqaıda mańyzdy ekenin túsindirýimiz kerek», deıdi ol.
Ata-analar da bul máselege erekshe nazar aýdarýy kerek. Almaty qalasynyń turǵyny, úsh balanyń anasy Gúlnar Seıilhan balalarynyń smartfondarynan osyndaı oıyndarǵa qatysty belgilerdi baıqap qalǵanyn aıtady. «Men balamnyń telefonynan osyndaı oıynnyń bastapqy tapsyrmasyn kórgende, birden sóılesip, onyń zııanyn túsindirdim. Eń bastysy – balalarymyzben ashyq áńgimelesip, olardyń ne oılaıtynyn tyńdaı bilý» deıdi G. Seıilhan.