Qazaqstanda dári-dármekti ýaqytynda jetkizbeıtin jetkizýshiler baqylaýǵa alynady. Densaýlyq saqtaý mınıstrligi josyqsyz kompanııalardy «qara tizimge» engizýdi qolǵa aldy. Bul bastama pasıentterdiń emin keshiktiretin jaǵdaılardyń aldyn alýǵa baǵyttalǵan, dep jazady Egemen.kz.
Qazaqstanda dárilik zattar men medısınalyq buıymdardy ýaqtyly jetkizbeıtin, sharttyq mindettemelerin buzatyn jetkizýshilerdiń tizimi jasaqtalady. Bul jóninde Densaýlyq saqtaý vıse-mınıstri Erjan Nurlybaev Ortalyq kommýnıkasııalar qyzmetinde ótken brıfıngte habarlady.
Onyń aıtýynsha, bıyl «Kabozantınıb» preparaty boıynsha onkologııalyq naýqastarǵa baılanysty birneshe shaǵym túsken. Sebebi tıisti tenderdi jeńip alǵan kompanııa dárini belgilengen merzimde jetkizbegen. Sonyń saldarynan emdelýshiler qajetti emdi ýaqytyly ala almaı otyr.
«Shart boıynsha mindettemeler oryndalmaǵan soń, Densaýlyq saqtaý basqarmasy kelisimdi birjaqty túrde buzdy. Qazir bul baǵytta jańa konkýrs jarııalaý jumystary bastaldy», dedi Erjan Nurlybaev.
Sondaı-aq, ol 2024 jyly Joǵary aýdıtorlyq palata tarapynan júrgizilgen tekseristen keıin Densaýlyq saqtaý mınıstrligi men «SQ-Farmasııa» mekemesine birneshe usynym berilgenin atap ótti. Sonyń biri — dári-dármek pen medısınalyq quraldardy júıeli túrde jetkizbeı júrgen jetkizýshilerdiń «qara tizimin» qurý.
«Qazirgi ýaqytta osy tizimdi qalyptastyrý jumystary júrip jatyr. Jaqyn arada bul mehanızmdi resmı túrde bekitý úshin salalyq normatıvtik aktilerge ózgerister engizemiz», dedi vıse-mınıstr.
Bul shara otandyq densaýlyq saqtaý júıesindegi tártip pen jaýapkershilikti kúsheıtýge baǵyttalǵan.
Janel TО́LEÝBEKOVA, EUÝ stýdenti