Mádenıet jáne aqparat mınıstri Aıda Balaeva Neapol qalasynda ótken IýNESKO-nyń «HHI ǵasyrdaǵy mádenı mura» atty ekinshi konferensııasyna qatysty. Bul týraly mınıstrliktiń baspasóz qyzmeti habarlady.
Konferensııaǵa qatysýshylar mádenı mura nysandaryn damytý, saqtaý jáne qorǵaý, dástúrlerdi qoldaý, sondaı-aq bilim berý men jastar baǵdarlamalaryn júzege asyrý máselelerin talqylady.
Mınıstrdiń aıtýynsha, bul mindetterdi iske asyrý – mınıstrliktiń basym baǵyttarynyń biri. Sonymen qatar Prezıdent Qasym-Jomart Toqaev Ulttyq quryltaı alańynda birneshe ret mádenı murany saqtaý men nasıhattaýdyń mańyzyna nazar aýdarǵan edi. Bul baǵyttaǵy jumystar el úkimeti bekitken Keshendi jospar aıasynda júzege asyrylady.
Konferensııa barysynda Aıda Balaeva mádenı mura nysandaryna klımattyń áseri týraly máseleni de kóterdi. Mysal retinde ol sý tasqyny, daýyl, órt jáne topyraq erozııasy sııaqty tabıǵı qubylystar eskertkishterdiń jedel buzylýyna áser etetinin atap ótti.
«Barlyǵymyz kúsh-jigerdi biriktirip, túrli elder ekologteriniń bolashaqtaǵy ekologııalyq jaǵdaı týraly boljamdaryn talqylap, muramyzdy saqtaý jóninde naqty usynystar ázirleýge baǵyttalǵan arnaıy halyqaralyq semınar ótkizýdi usynamyn», dedi A.Balaeva.
Sapar aıasynda Aıda Balaeva Italııanyń mádenıet mınıstri Alessandro Djýlımen kezdesý ótkizdi. Taraptar mádenı-gýmanıtarlyq saladaǵy ekijaqty yntymaqtastyqtyń qazirgi jaı-kúıi men keleshegin talqylap, eki el arasyndaǵy áriptestikti keńeıtýge baǵyttalǵan naqty qadamdardy bekitti.
Mınıstrdiń aıtýynsha, Qazaqstan men Italııany dostyq jáne ózara senimge negizdelgen qarym-qatynas baılanystyrady. Joǵary deńgeıde jasalǵan ózara kelisimder men ortaq josparlar da sonyń dáleli. Atap aıtsaq, Prezıdent Qasym-Jomart Toqaevtyń Italııaǵa jasaǵan sapary aıasynda mádenıet pen óner salasyndaǵy ózara túsinistik týraly memorandýmǵa qol qoıyldy. Italııa Mınıstrler Keńesiniń tóraǵasy Djordja Melonıdiń jýyrdaǵy sapary yntymaqtastyqty nyǵaıtýǵa jańa serpin berdi.
Soǵan sáıkes, eki eldegi ártisterdiń gastrolderi, birlesken kórmeler ótkizý, Qazaqstan men Italııanyń ulttyq mýzeıleri men teatr uıymdary arasyndaǵy yntymaqtastyqty tereńdetý, sondaı-aq mýzyka men kınematografııa salasyndaǵy ózara baılanys josparlanǵan.
Sonymen qatar taraptar restavrasııa salasyndaǵy áriptestikti keńeıtý jáne Qazaqstanda Restavrasııa ortalyǵyn ashý boıynsha birlesken jumystardy talqylady. Aıda Balaevanyń aıtýynsha, Italııanyń bul salada jetistigi mol, bul bilim men tájirıbe almasý úshin kóp múmkindik beredi.
Kezdesý sońynda Mádenıet jáne aqparat mınıstri mádenıet salasyndaǵy tıimdi yntymaqtastyqty jalǵastyrýǵa qyzyǵýshylyq bildirip, ıtalııalyq áriptesin Qazaqstanǵa shaqyrdy.