Elimizde bıdaıdy alys naryqtarǵa tasymaldaýǵa baılanysty shyǵyndardyń qunyn arzandatýǵa sýbsıdııalar tóleý bastaldy. Bul maqsatqa bıyl 40 mlrd teńgege deıin baǵyttalatyn bolady, dep habarlaıdy Egemen.kz.
Memlekettik sýbsıdııalaý baǵdarlamasy elimizden astyq eksportyn ulǵaıtýǵa yqpal etetin mańyzdy faktor retinde qarastyrylyp otyr. Qarjylyq qoldaý dıqandardyń shyǵyndaryn azaıtady, eksportty tıimdirek etip, jetkizýshilerge jańa múmkindikter ashady. Sarapshylar bul bastamanyń ekonomıkalyq paıdamen qatar, naryq tepe-teńdigin saqtaýǵa kómektesetinin aıtady. Iаǵnı qoımalardaǵy astyqtyń shamadan tys jınalýyn boldyrmaıdy jáne ishki baǵanyń tómendeýiniń aldyn alady. Sýbsıdııalar qanshalyqty tez bólinetini jáne eksporttaýshy kompanııalar kólik shyǵyndary úshin ótemaqyny qansha ýaqytta alatyny – agrarlyq qaýymdastyq muqııat baqylaıtyn másele.
Tólemderdiń bastalýyn rastaǵan Azyq-túlik korporasııasynyń málimetishe, sýbsıdııalaý normatıvi baǵytyna qaraı tasymaldanǵan bıdaıdyń tonnasyna 20 myń nemese 30 myń teńgeni quraıdy. 27 mamyrdaǵy derek boıynsha astyq naryǵy operatoryna 14,3 mlrd teńge somasyna kólik sýbsıdııalaryn alýǵa 284 ótinim kelip tústi. Osy ótinimder aıasynda 625,1 myń tonna astyq eksporttaldy.
Eń tanymal sýbsıdııalanatyn baǵyt – Ázerbaıjan bolyp otyr. Bul elge byltyr 275 229 tonna, sondaı-aq Baltyq elderine – 203 555 tonna bıdaı eksporttalǵan. Qara teńiz porttary arqyly eksport 48 815 tonnany, Baltyq teńizi (RF) – 35 967 tonnany qurady. Aýǵanstanǵa sýbsıdııalanatyn baǵyt boıynsha (Túrikmenstan aýmaǵy arqyly tranzıtpen) 37 032 tonna, Grýzııaǵa – 24 525 tonna eksporttaldy.