Oljas Bektenov Astanada ótken Sheteldik ınvestorlar keńesiniń 37-shi plenarlyq otyrysy aıasynda Eýropalyq qaıta qurý jáne damý bankiniń (EQDB) prezıdenti Odıl Reno-Bassomen kezdesti. Kezdesý barysynda taraptar kólik ınfraqurylymy, «jasyl» energetıka, shaǵyn jáne orta bıznes, aýyl sharýashylyǵy, sıfrlyq tehnologııalar sekildi mańyzdy salalardaǵy áriptestik máselelerin talqylady, dep habarlaıdy Egemen.kz.
Oljas Bektenov EQDB-nyń Qazaqstan ekonomıkasyn damytýǵa qosyp jatqan úlesine joǵary baǵa berip, 2023 jyly ekijaqty yntymaqtastyq aıasynda jalpy quny $935 mln bolatyn 25 joba júzege asyrylǵanyn atap ótti.
«Qazaqstan Prezıdenti Qasym-Jomart Toqaev ulttyq ekonomıkany damytýǵa jáne ınfraqurylymdy jańǵyrtýǵa belsendi qatysatyn Eýropalyq qaıta qurý jáne damý bankiniń róline erekshe nazar aýdarýda. Biz sizdermen kóptegen baǵyt boıynsha tyǵyz yntymaqtastyqtamyz jáne ózara is-qımyldyń strategııalyq sıpatyn joǵary baǵalaımyz. Bizdiń nazarymyz sapaly ósýdi arttyrý jáne halyqtyń ál-aýqatyn jaqsartý úshin ekonomıkalyq damýdy transformasııalaýǵa baǵyttalǵan. О́tken jyldyń ózinde biz Sizdermen keleshegi zor salalarda rekordtyq somasy $935 mln bolatyn 25 jańa jobaǵa qol qoıdyq. Qazaqstan Úkimeti Eýropalyq qaıta qurý jáne damý bankimen ózara múddeli máselelerdiń keń aýqymy boıynsha áriptestikti tereńdetýge daıyn ekenin bildiredi», dedi Oljas Bektenov.
Aıta keteıik, ótken jyly EQDB Qazaqstan ekonomıkasyna jyldyq ınvestısııa kólemin 3 eseden astamǵa ulǵaıtqan. Sonymen qatar taraptar 25 jobaǵa, onyń ishinde Aqtóbede jańa tazartý qurylystary men ilespe ınfraqurylym salý, Kókshetaýda 630 tósek-oryndyq kópsalaly aýrýhana salý jónindegi alǵashqy iri MJÁ jobasy jáne basqa jobalarǵa qol qoıǵan.
«Otandyq qarjy ınstıtýttary arqyly nesıe jelilerine keńes berý jáne usyný arqyly shaǵyn jáne orta bıznesti qoldaýǵa basa nazar aýdaryldy. Jalpy alǵanda, aǵymdaǵy portfelde quny $3,2 mlrd-tan asatyn 129 belsendi joba bar, onyń 75%-y ornyqty ınfraqurylym sektoryna tıesili. Birlesken jumys kezeńinde pýl $11,6 mlrd somasyna 340 jobany qurady», delingen habarlamada.
Sonymen qatar kezdesýde elektrmen jabdyqtaý senimdiligin arttyrý jáne elordanyń elektr energııasyna ósip kele jatqan suranysyn qamtamasyz etý úshin Astana qalasynda qosalqy stansa salý jobasy qaraldy. Sondaı-aq, ádil energetıkalyq aýysý (Just Energy Transition Partnership) boıynsha Qazaqstanda eldik platformasyn birlesip ázirleýge nazar aýdaryldy. JETP platformasy energetıka salasyna «jasyl» ınvestısııalardy tartýdyń mańyzdy quraly bolady.
EQDB Prezıdenti Odıl Reno-Basso ótken jyly ınvestısııa kóleminiń rekordtyq óskenin atap ótip, Qazaqstanmen yntymaqtastyqty odan ári tereńdetýge jáne ornyqty ekonomıka salasyndaǵy jobalardy birlesip júzege asyrýǵa múddeli ekenin atap ótti. EQDB 2029 jylǵa deıingi Ulttyq ınfraqurylym jospary sheńberinde jobalardy júzege asyrýǵa qoldaý kórsetedi.
Sondaı-aq «QazAvtoJol» UK» AQ men EQDB arasynda uzyndyǵy 136 km «Aqtóbe – Ulǵaısyn» jolyn rekonstrýksııalaý boıynsha qarjylandyrý kelisimine qol qoıyldy. Bul jol bóligi aldaǵy ýaqytta 4 jolaqty qozǵalysy bar 1-sanatty trassaǵa aınalady, jalpy uzyndyǵy – 234 km. Joba tranzıttik áleýetti arttyrý men kólik logıstıkasyn damytýǵa baǵyttalǵan.