Memleket basshysy Qasym-Jomart Toqaev BAQ salasy qyzmetkerlerin marapattady. Prezıdent jýrnalıster qaýymyn aldaǵy Buqaralyq aqparat quraldarynyń qyzmetkerleri kúnimen quttyqtap, ulttyq medıa halyqtyń úni, al jýrnalıst jasampazdyq jarshysy ekenin atap ótti.
– Sizder memleket saıasatyn elge túsindirip, qoǵam men bıliktiń arasynda kópir bolyp kelesizder. Elimizde jasalyp jatqan reformalardyń mán-maǵynasyn jurtshylyqqa jetkizip júrsizder. Bul – óte mańyzdy, kúrdeli, erekshe jumys. Árbir adamnyń qolynan kelmeıdi. Men búgin bárińizge shynaıy rızashylyǵymdy bildiremin. О́zderińiz bilesizder, keıingi jyldary memleketimizde aýqymdy ózgerister jasalýda, mańyzdy bastamalar júzege asyrylyp jatyr. Osydan 3 jyl buryn jalpyulttyq referendým arqyly Konstıtýsııamyzdy jańǵyrttyq. Memlekettiń búkil saıası júıesin ózgertetin tarıhı qadamdar jasadyq. Elimizde «Kúshti Prezıdent – Yqpaldy Parlament – Esep beretin Úkimet» qaǵıdaty ornyǵa tústi. О́kildi bıliktiń quzyreti kúsheıdi, atqarýshy bıliktiń jaýapkershiligi artty. Konstıtýsııaǵa sáıkes bılik tarmaqtary túgel jańǵyrtyldy. Aýyl jáne aýdan ákimderi tikeleı saılana bastady. Bılikke saıasatkerlerdiń jańa býyny kelip jatyr. Azamattarymyz memlekettik mańyzy bar sheshimder qabyldaý isine belsene aralasatyn boldy. Qoǵamda pikir alýandyǵy ornyqty, ıaǵnı, óz oıyn zańǵa sáıkes aıta alatyn, kókiregi oıaý, órkenıetti qoǵam ornyǵýda. Halqymyzdyń múlde jańa saıası bolmysy qalyptasty. Zań men tártip tujyrymdamasy qoǵamymyzdyń sana-seziminiń ajyramas bóligine aınalyp jatyr, – dedi Memleket basshysy.
Qasym-Jomart Toqaev júrgizilgen reformalar ekonomıka salasynda da óz jemisin berip jatqanyn atap ótti.
– Byltyrǵy osy ýaqytpen salystyrǵanda, ótken 5 aıda ulttyq ekonomıkamyz 6 paıyzǵa ósti. О́ńdeý ónerkásibiniń ósimi de 6 paıyzǵa jýyqtady. Jalpy, sońǵy bes jylda elimizdiń ishki jalpy ónimi 182-den 286 mlrd dollarǵa jetti. Biz buǵan ekonomıkany ártaraptandyrý arqyly qol jetkizip kelemiz. Búginde túrli salada osyndaı oń ózgerister bolyp jatyr. Eń bastysy, ulttyń bolmysy ózgere bastady. Elde jańa azamattyq, saıası mádenıet qalyptasyp, jańa qundylyqtar ornyǵýda. Jas urpaq «Adal azamatqa» tán qasıetterdi boıyna sińirip ósip jatyr. Zań ústemdik qurýy úshin naqty sharalar qolǵa alynyp jatyr. «Taza Qazaqstan» jalpyulttyq aksııasy naǵyz halyqtyq jobaǵa aınaldy. Azamattarymyz tabıǵaty taza eldiń nıeti de taza degen ustanymdy jan-jaqty nasıhattap, ortaq iske belsene atsalysýda. Osylaısha, Qazaqstan jańa turpatty elge aınala bastady. О́ıtkeni taza bolý, bul – nıeti de, isi de taza bolý degen sóz. Biz ozyq oıly ult bolýymyz qajet. Kósh bastaıtyn elderdiń qataryna qosylýymyz kerek. Bir el bolyp, judyryqtaı jumylsaq, bul maqsatymyzǵa mindetti túrde jetemiz. Osy ortaq jumysqa jýrnalıster qaýymy da zor úles qosyp júr. Sizderdi reformanyń qozǵaýshy kúshi dep aıtýǵa bolady. Túptep kelgende, bılik te, baspasóz de el ıgiligine qyzmet etedi. Elimizdiń maqsaty – bıik, baǵdary – aıqyn. Bul – Ádiletti, Qaýipsiz, О́rkenıetti jáne Taza Qazaqstandy qurý, – dedi Prezıdent.
Memleket basshysy qazir arqany keńge salatyn ýaqyt emes ekenin aıta kele, álemdegi geosaıası, geoekonomıkalyq ahýal shıelenise túskenine toqtaldy.
– Jahandyq qaýipsizdik júıesi túbegeıli ózgerip jatyr. Alpaýyt elderdiń teketiresi ýshyǵyp, keıbir aımaqta qarýly qaqtyǵystar órship barady. Álemdik arenada kúrdeli, bizge beımálim, tereń túsinýdi qajet etetin úderister oryn alýda. Negizinde, halyqaralyq quqyqqa qatysty uǵymdar aralasyp ketti. Kúshtiniń quqy dáriptele bastady. Ǵalamdyq sıfrlyq transformasııa búkil adamzatqa buryn-sońdy bolmaǵan qıyndyqtar ákeledi. Álem jańa dáýirge qadam basty. Munda jasandy ıntellekt tehnologııalary memlekettiń tabysty damýynyń basty faktoryna aınalady. Aldaǵy irgeli ózgeristerdiń aýqymyn bilgen jón. О́rkenıet kóshinen qalmaý úshin ınnovasııany barlyq salaǵa qarqyndy túrde engizý qajet. Memleket basshysy retinde osy iske basa mán beremin. Jasandy ıntellektiniń keńinen taralýy kez kelgen mamandyqqa, sonyń ishinde sizderdiń kásipterińizge de múldem jańa talaptar qoıady. Kóptegen sarapshy keleshekte adam eńbegin algorıtmder almastyratynyn aıtyp júr. Alaıda bul ózgerister jýrnalıstıkanyń jańa múmkindikterin, shyn máninde ekinshi tynysyn ashýy ábden múmkin. Qazirdiń ózinde jańa neırojeliler suranysqa ıe biregeı kontent óndirý úshin qajet aqparatty izdep, taldaı alatyn paıdaly quralǵa aınaldy. Otandyq jýrnalıster árdaıym shyǵarmashyl, jańashyl ári damýǵa qushtar. Sizderdiń jańa tehnologııa múmkindikterin tolyǵymen paıdalanatyndaryńyzǵa senimdimin. Búginde elimizde medıasalanyń, sonyń ishinde blogosferanyń qanat jaıýyna barlyq jaǵdaı jasalǵan. Oqıǵa ortasynan shynaıy aqparat taratýda ózderińizge mol jaýapkershilik júktelgen. Muny sezine bilý óte mańyzdy, – dedi Qasym-Jomart Toqaev.
Prezıdenttiń aıtýynsha, almaǵaıyp, bulyńǵyr zamanda, eń aldymen, el birligin saqtap, basty baılyǵymyz – turaqtylyq pen tynyshtyqty baǵalaý qajet.
– Osy oraıda, jýrnalısterge aıryqsha senim men zor jaýapkershilik júkteledi. Mirjaqyp Dýlatov «Qaı jurttyń baspasózi kúshti bolsa, sol jurttyń ózi de kúshti» degen. Shyn máninde, sóz – asa qýatty qarý. Biraýyz sóz araz eldi tatý qylady, tatý eldi araz etedi. Sondyqtan sóz qudiretin tereń túsinip, onyń salmaǵyn sezine bilý qajet. Qazirgi aqparat tasqynynda senimdi derek, dáıekti taldaý usynýdyń mán-maǵynasy arta tústi. Jýrnalıstiń aǵartýshylyq mıssııasy aldyńǵy qatarǵa shyqty. Kez kelgen aqparatty muqııat elep-ekshep, jurtqa durys jol kórsetý óte mańyzdy. Bul rette, sizderdi aqparat áleminiń temirqazyǵy deýge bolady. Men jýrnalısterimizdiń ár málimetti ult múddesi turǵysynan saralaı alaryna senemin. О́ıtkeni ózim kóp oqımyn, sizder jazǵan maqalalarmen, oı-pikirlermen tanyspyn. Qazir jýrnalısterimiz túrli salada jumys istep júr. Qalamger ári qaıratker azamattarymyz az emes. Aqparat salasynyń ókilderi Parlament pen máslıhattarda tabysty eńbek etýde. Sondaı-aq jergilikti jáne ortalyq atqarý organdarynda qyzmet etip júrgen azamattar bar. Bul jýrnalıstiń besaspap mamandyq ıesi ekenin anyq kórsetedi, – dedi Memleket basshysy.
Qasym-Jomart Toqaev búgingi jıynǵa aqparat salasynyń ardagerleri arnaıy shaqyrylǵanyna nazar aýdardy.
– Saýyq Jaqanova, Jarylqap Beısenbaıuly, Sharhan Qazyǵul sııaqty jýrnalıstıka maıtalmandary ortamyzda otyr. Sizder ulttyq aqparat salasyn damytýǵa zor úles qostyńyzdar. Tilshilerdiń tutas býyny ózderińizge qarap ósti. Sizderge zor rızashylyǵymdy bildiremin. Qaı salada bolsyn, adal eńbek laıyqty baǵalanýǵa tıis. Bul – bárimiz birge quryp jatqan ádiletti qoǵamnyń myzǵymas ustanymy, – dedi Prezıdent.
Memleket basshysy jyl saıynǵy dástúrge saı jýrnalısterge Prezıdent syılyǵy men granttaryn tapsyryp, alǵysyn jarııalady. Sonymen qatar medıa salasynyń ókilderin memlekettik nagradamen marapattady.
Is-sharada jýrnalıstıka salasynyń ardageri Sharhan Qazyǵul, «Kazahstanskaıa pravda» gazetiniń bólim meńgerýshisi Iýlııa Mager jáne «Habar» telearnasynyń júrgizýshisi Gúlnázııa Zarıpova sóz sóıledi.
Aıta ketken jón, osy kúni marapattalǵandar qatarynan «Qazaq gazetteri» seriktestigine qarasty basylymdarda qyzmet etetin áriptesterimiz de kórindi. Atap aıtsaq, Prezıdenttiń BAQ salasyndaǵy syılyǵy «Egemen Qazaqstan» gazeti bas redaktorynyń orynbasary Talǵat Batyrhanǵa jáne «Kazahstanskaıa pravda» gazetiniń bólim redaktory Iýlııa Magerge berildi. Al «Ana tili» gazetiniń shyǵarmashylyq ujymyna Prezıdenttiń Alǵysy jarııalandy. Sonymen qatar «Uıǵyr avazı» gazetiniń bas redaktory Ershat Ásmátov «Qurmet» ordenimen, «Ulan» gazetiniń bas redaktory Jadyra Narmahan «Eren eńbegi úshin» medalimen marapattaldy.