Taıaýda densaýlyq saqtaýdy damytýdyń respýblıkalyq ortalyǵy saladaǵy ótken jyldyń qorytyndylaryna monıtorıngtik zertteýler júrgizip, ár oblystaǵy istiń jaı-kúıine reıtıngtik baǵalar berdi. Munda Oral óńiri eń sońǵy 16-shy orynnan bir-aq shyǵypty.
«Egemen Qazaqstan» gazetiniń Batys Qazaqstan oblysyndaǵy menshikti tilshisi Temir Qusaıyn
Batys Qazaqstan oblystyq densaýlyq saqtaý basqarmasynyń basshysy Hamıdolla IRMENOVKE:
– Siz buǵan ne deısiz?
– Birden aıtarym, joǵarydaǵy reıtıngtik baǵa shyndyqqa sáıkes kelmeıdi. Bul jóninde biz atalǵan ortalyqqa arnaıy hat joldadyq. Qazir onyń jaýabyn kútip otyrmyz. Naqty dálelmen jáne dáıekpen aıtylmasa qandaı jaqsy iske de kóleńke túspeı qoımaıdy. Árıne aqtalǵanymyz emes, naqty derekterge súıensek, oblystaǵy densaýlyq saqtaý isiniń ótken 2014 jylǵy basty nátıjeleri tómendegideı.
О́ńirde Densaýlyq saqtaý mınıstri alǵa qoıǵan barlyq mindetter men is-sharalar kesheni oıdaǵydaı oryndaldy. Osy aralyqta 69,5 dep kútilgen turǵyndardyń ortasha ǵumyr jasy 70,2-ni kórsetip tur. Sondaı-aq, ár 1000 adamǵa shaqqandaǵy jalpy ólim-jitim deńgeıi men sábılerdiń shetineýiniń tómendeý mólsheri kútilgen kórsetkishten asyp tústi. Sonymen birge, árbir 100 myń turǵynǵa eseptegendegi onkologııalyq aýrýlardan bolatyn ólim de aldyn ala boljaǵan deńgeıden áldeqaıda az boldy.
Osyndaı túıindi týberkýlezden bolatyn qaıtys bolý kórinisterine de qatysty aıta alamyz. Ulttyq ekonomıka mınıstrligi Statıstıka jónindegi komıtetiniń derekterine súıensek, bılyǵy 2015 jyldyń 1 qańtarynda aldyńǵy 2013 jylmen salystyrǵanda Batys Qazaqstan oblysynda turǵyndardyń ómirden ótý kórsetkishteri ájeptáýir tómendegen. Jáne 1000 adamǵa shaqqanda osy aralyqta sábılerdiń ómirge kelý koeffısıenti birshama kóterilgen.
Eń sońǵy oryn emes, kerisinshe oblystaǵy kórsetkishter joǵaryda aıtylǵandaı kóptegen ındıkatorlar boıynsha aldyńǵy orynǵa laıyqty ekenin kórsetedi. Buǵan qosarym, oraldyq otolarıngologter men kardıohırýrgter jáne travmatologter budan basqa da kóptegen mamandar respýblıka boıynsha eń úzdik dep tanylyp otyr. Bul oı-pikirimizge Oral óńirine olardy arnaıy izdep ózge oblystardan jáne taıaý shetelderden janyna shıpa izdegenderdiń tolassyz kelip jatqany aıqyn aıǵaq. Biz medısınalyq qyzmet kórsetýdiń eń joǵarǵy deńgeıine qol jetkizý úshin kún saıyn jan-jaqty jumystar júrgizip kelemiz. Sonyń laıyqty túrde baǵalanǵanyn qalaımyz.
Batys Qazaqstan oblysy.