Meteorologııalyq qyzmet bıylǵy jazdyń qalyptaǵydan 2-3 gradýs joǵary ekenin aıtady. Ystyq kúnderi qoly bos jannyń bári, ásirese balalar, jastar ózen-kólder jaǵasyna asyǵady. Soltústik Qazaqstan óńirinde sýǵa túsýge bolatyn 60 ózen men jylǵa, 2 myńnan artyq kól, júzge jýyq qazylǵan sý qoımasy bar.
Alaıda sý qoımalary tegis qaýipsiz emes, ishinde kúrt tómendep ketetin tereńderi de, aǵyny qatty ózender de bar. Keıingi on jylda oblysta 216 adam, onyń ishinde 34 bala sýǵa batyp ketken. Al keıingi úsh jylda ǵana 15 adam sýdan qaza tapty. Byltyr sýǵa túsý maýsymy bastalmaı jatyp úsh bala sýǵa ketti. Asa qaýipti sý qoımalary qatarynda Esil ózeni, Alakól, Solenyı, Lebıaje, Úlken Torańǵul, Shalqar, Imantaý kólderi atalady.
Qazir barlyq kóldiń altaýy kommýnaldyq menshikke qaraıdy, qalǵan elý tórtin kásipkerler jalǵa alǵan. Osylardyń ishinde keıbir sý qoımalarynyń shomylýǵa qaýipti ekenin baqylamaıtyndary jıi kezdesedi. Osy turǵyda azamattyq qorǵanys basqarmasynyń aǵa ofıseri Rızabek Temirbekov bıylǵy sýdan saqtandyrý sharalary týraly aıtyp berdi.
«Biz barlyq sý qoımalaryndaǵy qaýipsizdik sharalaryn tekserdik. Jedel qutqarý jasaǵynyń kúshi men quraldary tótenshe jaǵdaımen kúresýge daıyn. Sýǵa júzý quraldary, súńgý jaraqtary da daıyndyq sapynda. Atap aıtsaq, 24 júzý quraly sýǵa túsirilgen. Bulardan basqa 25 motorly qaıyǵymyz, sýǵa súńgý qajet etilgen jaǵdaıda qoldanylatyn 20 dana gıdrokostıýmimiz bar. Halyq sýǵa kóp túsetin Esildiń boıy men Alakóldiń jaǵasyna táýlik boıy kezekshilik uıymdastyryldy. Kún qatty ysyp ketetin bolsa, Shalqar, Imantaý kólderine de osyndaı sharalar qoldanbaqpyz», dedi ol.
Jergilikti bılik tarapynan 2025 jylǵy sýǵa túsý qaýipsizdigin qamtamasyz etýdi qarastyrǵan sharalar jospary da bekitilgen. Onyń jumysyna «Amanat» partııasynyń fılıaly men Jastar resýrsy ortalyǵynyń músheleri, polısııa qyzmetkerleri, áskerıler tartylǵan. Osy ýaqytqa deıin TJ jónindegi komıssııanyń eki otyrysy ótti. Onyń qorytyndysy boıynsha oblystyq bilim basqarmasyna barlyq oqýshylarǵa sýǵa shomylý qaýipsizdigine baılanysty WhatsApp jelisi arqyly eskertý usynylǵan.
Soltústik Qazaqstan oblysy