Búgin Úkimet otyrysynda elimizdiń shekara ınfraqurylymyn jańartý máselesi qaraldy. Qarjy mınıstri Mádı Tákıevtiń aıtýynsha, jyl sońyna deıin Qazaqstandaǵy halyqaralyq avtomobıl ótkizý pýnktteriniń 100%-y jańǵyrtylady, dep jazady Egemen.kz.
Mınıstrdiń aıtýynsha, Qaplanbek, Atameken, Kóljat jáne Alakól ótkizý beketteri jańartylyp, qoldanysqa berilgen. Al qalǵan bes pýnkt – Qazyǵurt, Tájen, Temir baba, Maıqapshaǵaı jáne Baqty jyl sońyna deıin kezeń-kezeńimen iske qosylady. Osylaısha, Qazaqstannyń syrtqy shekarasyndaǵy barlyq avtomobıl beketteri tolyq jańǵyrtýdan ótedi.
О́tkizý jyldam, baqylaý naqty
Jańǵyrtý nátıjesinde pýnkterdiń ótkizý qabileti orta eseppen 25%-ǵa, al Qytaımen shekarada 37%-ǵa artqan. Buǵan deıin 9 saǵatqa deıin sozylatyn shekaradan ótý ýaqyty qazir 3 saǵatqa deıin qysqarǵan.
«Bul ınfraqurylymdy jańartýdyń ǵana emes, sıfrlyq sheshimderdiń de jemisi», dedi Mádı Tákıev. Onyń aıtýynsha, CargoRuqsat elektrondy kezek júıesi iske qosylyp, 55 myń júrgizýshi men 145 myń kólik quraly tirkelgen. Bul joba adam faktoryn azaıtyp, ótý rásimderin ashyq ári ádil etýdi kózdeıdi.
Biryńǵaı sıfrlyq baqylaý júıesi
Jańǵyrtý jumystary tolyq aıaqtalǵannan keıin barlyq ótkizý beketteri syrtqy shekarany basqarýdyń biryńǵaı sıfrlyq júıesine biriktiriledi. Bul tek saýda logıstıkasyn jeńildetip qoımaı, shekara qaýipsizdigin de arttyra túspek. Bıznes pen azamattar úshin jyldam, qaýipsiz jáne ashyq ótýdiń jańa úlgisi qalyptasady.