Keri osmos tehnologııasy boıynsha sý tazartý júıelerine arnalǵan spıraldy membranalardy óndirýdi alǵash ret «Ekotek Injınırıng» kompanııasy Q.Sátbaev ýnıversıtetimen birlesip iske asyra bastady. Ǵylym jáne joǵary bilim mınıstrliginiń qoldaýymen júzege asqan Membraneco jobasy sý tazartý tehnologııalarynyń ozyq ádisterin óndiriske engizip otyr. Joba ımportty almastyrýǵa negizdelgen ári ónerkásiptegi tyń ǵylymı baǵyt retinde damıtyn bolady.
О́ndiristik jeliler «Alataý» arnaıy ekonomıkalyq aımaǵynda ornalasqan. Qazirgi kezde kásiporyn RFID belgilerimen jabdyqtalǵan alǵashqy ónimin shyǵara bastady. Sıkl sıfrlyq júıemen basqarylady.
Buǵan deıin sý júıesine arnalǵan barlyq membranalar shetelden jetkizilip kelgen bolsa, endi ǵylym men bıznestiń yqpaldastyǵy aıasynda óz elimizde membranalardy shyǵarý jolǵa qoıylyp, Mańǵystaý sııaqty óńirlerde sýdy tazartý men tushytý barysynda qoldanylatyn bolady.
Jaqynda «Samuryq-Qazyna Kontrakt» AQ ózara mindettemelerdiń oryndalýyna qatysty josparly monıtorıng júrgizip, kásiporynda jobanyń sátti júzege asyp jatqandyǵyn baǵalady. «Sý tazartatyn óndiristik sıkl elimizdiń ındýstrııalyq áleýetiniń damýyna qosqan zor úlesimiz bolmaq. Monıtorıngten sátti ótý – ulttyq kompanııalarmen ózara árekettiń ashyqtyǵy men tıimdiligin qamtamasyz etýmen qatar ary qaraı da aýqymdy jobalardy júzege asyrýǵa daıyndyǵymyzdy, qabiletimizdi kórsetedi», deıdi «Ekotek Injınırıng» kompanııasynyń basshysy Anýar Dýkýmbaev.
Q.Sátbaev ýnıversıteti ǵylymı saraptama jasap, zerthanalyq baza men óndiristik alańdardy usynýmen qatar kásiporynnyń teń quryltaıshysy sanalady. Bul ýnıversıtettiń ǵylymı áleýetin, bıznespen yntymaqtastyqta básekege qabiletti óndiristi iske qosyp, tutas salanyń qurylymyn ózgerte alatyndyǵyn kórsetedi. Q.Sátbaev ýnıversıtetiniń prorektory Sapar Shalabaev atap ótkendeı, bıznes pen tehnologııa toǵysynda júzege asatyn jobalar ınjenerlik bilim berý ekojúıesiniń mańyzdy bólshegine aınalyp otyr. Mundaı qadam qazirgi jumys istep turǵan óndiris bazasynda mamandardy daıarlaýǵa ǵana emes, sondaı-aq ǵylymı ınfraqurylymǵa qosymsha ınvestısııa tartýǵa múmkindik beredi.
Monıtorıngtik top jumysynyń qorytyndysy boıynsha «Samuryq-Qazyna» AQ-nyń enshiles kompanııalaryna joba operatorymen offteık-kelisimsharttar jasalatyn bolady. «О́ndiris el aýmaǵyndaǵy sý qaýipsizdigin qamtamasyz etýdegi tehnologııalyq áleýetti nyǵaıtýǵa baǵyttalǵan. Bul bir ǵana óndiris ornyn ashýmen shektelmeıdi. Bolashaqta ult densaýlyǵyn jaqsartýǵa, ekologııalyq turaqtylyqqa jáne ǵylymı-tehnıkalyq úderistiń damýyna yqpal etetin bolady», deıdi «Samuryq-Qazyna Kontrakt» kompanııasy offteık-kelisimsharttar departamentiniń jetekshi menedjeri Dınara Túmenova.
Qazirgi tańda óndiris kelesi kezeńniń daıyndyǵyna kirisken. О́ndiris kólemin ulǵaıtýdy kózdep otyrǵan mamandar súzgi túrlerin kóbeıtip, óz ónimin Ortalyq Azııa, Kavkaz, Reseı men Túrkııa naryǵyna eksporttaýdy kózdep otyr.
ALMATY