Múmkindigi shekteýli jandarǵa búginde Batys Qazaqstan oblysynda 1182 nysan tolyq beıimdelgen, al jyl sońyna deıin taǵy 59 nysandy beıimdeý josparlanyp otyr, dep habarlaıdy Egemen.kz.
Eńbek jáne áleýmettik qorǵaý mınıstrliginiń málimetinshe BQO-daǵy beıimdelgen nysandardyń jalpy sanynan múgedektigi bar adamdardyń barlyq sanattary úshin qoljetimdileri:
- densaýlyq saqtaý obektileri– 105;
- bilim berý nysandary – 443;
- mádenıet nysandary – 58;
- memlekettik jáne kvazımemlekettik uıymdar – 239;
- sport nysandary – 120;
- áleýmettik qorǵaý obektileri – 17;
- saýda nysandary menoıyn-saýyq ortalyqtary – 44;
- basqa da nysandar – 156.
«Men «Aqjaıyq» ońaltý ortalyǵyndamyn jáne munda múmkindigi shekteýli jandarǵa qajetti barlyq jaǵdaı jasalǵanyn atap ótkim keledi, mysaly, búıirlik joldar, pandýstar, sanıtarlyq toraptar bizdiń qajettilikterimizge laıyqtalǵan. Mundaı jaǵymdy jaǵdaı Oral qalasynda ǵana emes, oblystyń óńirlerinde de baıqalady», deıdi birinshi toptaǵy múgedek, atalǵan qala turǵyny Baýyrjan Rahmetov.
Oblystyń halyqty áleýmettik qorǵaý salasyndaǵy retteý jáne baqylaý komıtetiniń departamenti jyl basynan beri jospardan tys baqylaý sheńberinde 7 tekserý júrgizgen. Tekserý qorytyndysy boıynsha 4 nysanda buzýshylyqtar anyqtalyp, 943,7 myń teńge kóleminde ákimshilik jaýapkershilikke tartyldy.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, olardy joıý týraly nusqamalar ǵana engiziletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynatyn bolady.