Aty ańyzǵa aınalǵan ǵaryshker, Halyq qaharmany Talǵat Amangeldiuly Musabaev baqıǵa ozdy. Qazaq jurtshylyǵy qamshy sabyndaı tirlikte úsh márte ǵaryshqa sapar shegip, 341 táýligin alqara kók aspanda ótkizgen ańyz tulǵasynan aıyryldy.
Adamzat balasy mıllıondaǵan jyl boıy qanatty qustaı kókke ushyp, ǵalamshardy qaq jarǵan qus jolyn tilip ótip, ǵaryshqa tóte sapar shegýdi qııaldap kelgeni belgili. Sol adamzattyq ańsarǵa 1961 jyldyń 12 sáýirinde Iýrıı Gagarın qol jetkizip, Qorqyt qobyzynyń úni qalǵan dalamyzdan uly saparǵa attandy. Jumyr jer betin dúr silkintken sol tarıhı oqıǵadan keıin qanshama qaradomalaq armanyna qanat baılap, ǵaryshker bolmaqqa bel býdy. Sonyń biri ári biregeıi – Talǵat Amangeldiuly Musabaev edi.
Almaty oblysy Qarǵaly aýylynda 1951 jyldyń 7 qańtarynda dúnıege kelgen armanshyl ul 1994 jyly ǵaryshqa kóterildi. Sóıtip, qazaq halqynan tuńǵysh ǵarysh esigin ashqan dańqty aǵasy Toqtar Áýbákirovtiń jolyn jalǵap, osy saparda 126 kún ǵaryshta aıaldady. Talǵat Amangeldiuly 1998 jyly – 208 kún, 2001 jyly 8 kún ǵylymı zertteý júrgizdi. Adamzat balasynyń ǵaryshty ıgerýine eleýli úles qosty.
Zeńgir aspan júzindegi ár qubylysqa qumarta qaraǵan qazaq balasynyń arzý armanyn Jetiqaraqshyǵa jetkizip, juldyzdary jamyraǵan ǵaryshta táýelsiz eldiń kók baıraǵyn jelbiretip, jurttyń tileýin Temirqazyqqa aıtqan arda azamattyń rýhy eli barda umytylmasy anyq. Sondyqtan da, batyr Talǵattyń artynda qalǵan qalyń eline qaıǵyra kóńil aıtamyz! Jaratqan ıe qabyrǵamyzdy qaıystyrǵan qaraly qazanyń qaıyryn bergeı!
Qosh bolyńyz, ǵarysh qaharmany!
«Qazaq gazetteri» seriktestiginiń ujymy