Grekııada kúres túrlerinen jasóspirimder arasyndaǵy (U-17) álem chempıonaty aıaqtaldy. Afınadaǵy dodany elimizdiń grek-rım kúresi sheberleri bes júldemen qorytyndylady.
45 kg salmaq dárejesinde kúsh synasqan aqtóbelik balýan Jańajol Qýanyshbek sheberliktiń shynaıy úlgisin kórsetip, bas júldeni oljalady. Sheshýshi beldesýde utylǵan Nurdáýlet Qumaruly (48 kg) men Nuráli Asqar (55 kg) kúmis alsa, Shámil Dosbol (65 kg) men Marlen Meıirbekuly (71 kg) qola medaldy qanaǵat tutty.
Qyzdar arasyndaǵy jarysta Madhııa Ýsmanovaǵa teń keler eshkim tabylmady. 57 kg salmaqta synǵa túsken ol ıtalııalyq Sofııa Rıtter, kanadalyq Kaı Nessa Pare, ýkraınalyq Ivanna Lýkıanenko, japonııalyq Saıýkı Tanadany tize búktirip, fınalda úndistandyq Monı Monmen kúsh synasty. Dál osy balýanmen Ýsmanova osydan bir aı buryn Azııa birinshiliginde jolyǵyp, jol bergen edi. Bul joly Madhııanyń mereıi ústem bolyp, álem chempıony atandy. Taǵy eki arýymyz qola medaldy qorjynǵa saldy. Olar – Injý Baqqoja (43 kg) men Shákızada Dáýlethan (69 kg).
Al Erkin kúres sheberleri úsh qola júlde aldy. 51 kg salmaqtaǵy Danael Ábdiqasym jartylaı fınalda amerıkalyq Samýel Reıes Sancheske ese jiberip, úshinshi oryn úshin básekede grýzııalyq Temýrı Tatarashvılıdi tize búktirdi. 60 kg salmaq dárejesinde synǵa túsken Bekasyl Asambek úshinshi oryn úshin beldesýde ırandyq Muhammedreza Mehralızadeni jeńdi. 80 kg salmaqtaǵy Dinmuhammed Qasymbektiń jartylaı fınalda Parsy eliniń pehlevany Muhammadpasha Karamıge áli jetpegenimen, qola júlde úshin aıqasta moldovalyq Ivan Paslarıden aılasyn asyrdy.