24 elde ókildigi bar Pressenza halyqaralyq baspasóz agenttigi Dımash Qudaıbergen týraly maqalasyn shyǵardy, dep habarlaıdy Egemen.kz.
Kanadadaǵy avtor Klaýdıa Aranda jazǵan "Álem – onyń kıiz úıi: Dımash jáne polıarızasııalanǵan álemdegi mádenı dıalog arhıtektýrasy" atty maqalada qazaqstandyq ánshiniń mádenıetter arasyndaǵy kópir retindegi róli taldanady.
Avtor Dımashtyń shyǵarmashylyǵy geosaıası qaqtyǵystar men mádenı alalaýshylyqtardan joǵary turyp, kórermenderdi biriktiretinin atap ótedi. Onyń daýsy – túrli tilder men dástúrlerdi toǵystyratyn beıresmı dıplomatııanyń quraly retinde sıpattalǵan.
- Onyń Qazaqstannan shyqqan tegi jaı ǵana ómirbaıandyq derek emes – ol eki yrǵaqpen tynystaıtyn ónerdiń tereń tamyry: myńjyldyq dástúr men jahandyq zamanaýılyqtyń toǵysy. Ǵasyrlar boıy aýyzsha poezııamen, epostyq jyrlarmen, kóshpeli áýendermen nárlengen qazaq mádenıeti onyń úninde tiri muraǵattaı saqtalǵan. Árbir áýen – joldardyń, ımperııalar men órkenıetterdiń qıylysy bolǵan geografııanyń jady. ol urpaqtan urpaqqa aýyzsha taraǵan dástúrler men mádenı aralasýdyń arqasynda búginge jetti, – deıdi ol.
Maqalada qazaq mádenıetiniń tamyry men jahandyq zamanaýılyqtyń úılesimi Dımashtyń ónerinde aıqyn kórinis tabatyny aıtylǵan. Ánshi tek janrlardy túrlendirýshi emes, mádenıetterdi toǵystyrýshy tulǵa retinde baǵalanady.